Në organizimin për fundvit me gazetarët, presidentja Vjosa Osmani me paraqitjen e saj edhe si imazh, e ka vendosur pikën mbi “i” në temën për ‘identitetin’ e saj politik.
Presidentja e Kosovës për një moment harroi të gjitha paralajmërimet dhe deklaratat e saj se Republika e Kosovës mund të përballet me sulme të reja që po përgatiten në Serbi dhe u shfaq jo më si një komandante supreme, por si një hajgaregjike. U shfaq si një kopje e keqe e presidentëve amerikanë, të cilët në konferencat e fundvitit zakonisht tallen në llogari të tyre për t’i neutralizuar efektet politike dhe relaksuar raportet reciproke me të ftuarit, shkruan Demokracia.com.
Nga kopjimi i veshjes gjysmëushtarake të presidentit ukrainas, Zelenski, në kërkim të një figure përfaqësuese, presidentja Osmani u shfaq mbrëmjen e së mërkurës si një Barbie.
Ky ndryshim i madh në paraqitjen e Osmanit, vetëm pak ditë pasi njoftoi popullin se Republika e Kosovës mund të përballet me një sulm të ri nga Serbia dhe pas shëtitjeve të shpeshta me veshje gjysmëushtarake e jozyrtare, në një presidente të veshur si Barbie, rikthen në vëmendje joseriozitetin e të parës së shtetit dhe pikërisht mungesën e identitetit të saj politik.
Presidentja Osmani as pas afër 4 vitesh që nga zgjedhja e saj në këtë detyrë, nuk ka arritur të tregojë se nuk është një notere që i shërben kryeminstrit Albin Kurti. As pas afër 4 vitesh në krye të shtetit, presidentja Osmani nuk ka arritur ta lë qoftë edhe një punë të mirë, një iniciativë të mirë, si trashëgimi politike. Madje, edhe ato që i kishte nisur, ka dështuar që t’i riorganizojë në këtë vit.
Vetëm gjatë vitit 2023, Osmani nuk ka luajtur rolin e saj të përcaktuar me Kushtetutën e Republikës së Kosovës, por me vendimet, deklarimet dhe heshtjen e saj, është vënë në shërbim të Kurtit.
Për këtë, shembujt janë të shumtë dhe njëri prej tyre është edhe refuzimi i Osmanit për të dekretuar Kryeprokuroin e Shtetit, Blerim Isufaj, sipas rekomandimit të Këshillit Prokurorial të Kosovës.
Përmes mosdekretimit të paargumentuar, Osmani po mbante qëndrimin e njëjtë me atë të Kurtit, i cili në një rast nga foltorja e Kuvedit të Kosovës kishte sulmuar rëndë kandidatin për kryeprokuror.
“Kryeprokurori” | Si ia “shkruajti” Kurti vendimin presidentes Osmani gjashtë muaj më herët?
Pikërisht në konferencën e mbajtur për mosdekretimin e Kryeprokurorit, Osmani kishte kërcënuar deputetët e Kuvendit të Kosovës që paralajmëronin se vendimin e Osmanit mund ta dërgonin në Gjykatën Kushtetuese.
“Nëse për arsye politike zgjedhin një rrugë të tillë [dërgimi në Gjykatë Kushtetuese], atëherë kjo për mua është vetëm betejë politike e jo ligjore dhe kushdo që do betejë politike me mua, betejë politike do të ketë”, kërcënonte Osmani më 17 tetor 2023.
Me anë të kësaj deklarate, Osmani po i jepte fund përfaqësimit të unitetit të popullit, pasi ajo ishte në kundërshtim të plotë minimalisht me dy nene të Kushtetutës së Republikës së Kosovës [Neni 70 – Mandati i Deputetëve dhe Neni 83 – Statusi i Presidentit]. /Demokracia.com/
