Adhuruesit e Cillian Murphy dhe dramës së BBC “Peaky Blinders” po marrin lajme të këqija sepse sezoni i gjashtë i serialit do të jetë i fundit, raportojnë mediat ndërkombëtare.

Seriali nga regjisori i nominuar për Oskar, Steven Knight, tregon historinë e Tommy Shelby (Murphy) dhe ngritjen e familjes së tij në pushtet në Birmingham pas Luftës së Parë Botërore. Megjithëse seriali kishte rifilluar së fundmi xhirimet pas ndërprerjeve prej pandemisë, BBC konfirmoi që Sezoni 6 do të mbyllte serinë.

Knight i tha Deadline se ai ende planifikon të ndjekë finalen e serialit me një film, duke thënë, “Covid ndryshoi planet tona. Por mund të them se plani im që nga fillimi ishte ta përfundoja “Peaky Blinders” me një film. Kjo është ajo që do të ndodhë. ”

Lajmi është pak tronditës duke marrë parasysh se Knight ishte në bisedime së fundmi me Entertainment Weekly vitin e kaluar dhe shpresonte që seriali të vazhdonte përtej Sezonit 6. Por bazuar në çështjet e vazhdueshme në tregun global në lidhje me xhirimet dhe problematikat e shkaktuara për shkak të Covid-19, supozohet se përshpejtuan përfundimin e serialit.