Qendra e teknologjisë dhe inovacionit e Turqisë, Lugina e IT-së (Bilişim Vadisi), do të jetë mikpritëse e një kampi veror ndërkombëtar për zhvilluesit e video-lojërave muajin e ardhshëm.
Me lokacion në provincën veriperëndimore Kocaeli, Qendra Digjitale e Animacionit dhe Lojërave (Digiage) në Luginën e IT-së do të presë zhvillues lojërash nga 21 vende në periudhën 1-11 shtator.
Më shumë se 1.000 entuziastë të lojërave nga e gjithë bota, përfshirë Greqinë, Francën, Kazakistanin, Pakistanin dhe Nigerinë, pritet të marrin pjesë në Kampin Veror Ndërkombëtar të Zhvillimit të Lojërave, shkruan Anadolu Agency (AA).
Zhvilluesit e softuerëve, dizajnerë, skenaristë, publikues, reklamues dhe menaxherë në ekosistemin e lojërave pritet të marrin pjesë si personalisht ashtu edhe online, duke qëndruar në tenda ndërsa hartojnë projektet e tyre për t’i paraqitur para një jurie ndërkombëtare gjatë kampit dhjetëditor.
“Ne synojmë të kontribuojmë në prodhimin e vlerave në nivel ndërkombëtar në fushën e lojërave. Të bashkosh të rinjtë nga kultura të ndryshme është shumë e vlefshme, pasi diversiteti luan një rol të rëndësishëm në gjenerimin e ideve origjinale”, tha Serdar Ibrahimcioğlu, drejtori i përgjithshëm i Luginës së IT-së.
Ai nënvizoi se me këtë ngjarje, Digiage do të jetë i mbushur me një dimension ndërkombëtar, duke shtuar se shpresojnë të presin më shumë vende në të ardhmen.
Digiage u krijua për të mbështetur ekosistemin turk të zhvillimit të video-lojërave duke tërhequr profesionistë të aftë në sektor dhe duke kontribuuar në zhvillimin e studiove të lojërave me kampe të tilla. Pasi një kamp i mëparshëm u mbajt virtualisht në dimër, ky kamp veror do të mbahet si virtualisht, ashtu edhe me pjesëmarrje fizike.