“Masat janë të përkohshme”!
Kështu i quante sanksionet e BE-së në fillim të korrikut të vitit 2023, Albin Kurti, njeriu që hyri në historinë politike të Kosovës si kryeministri që e futi vendin nën sanksione ndërkombëtare.
Por, që nga 3 korriku i këtij viti, po bëhen 6 muaj dhe “përkohshmëria” e sanksioneve të BE-së po vazhdon pambarim dhe me pasoja të rënda për Republikën e Kosovës, shkruan Demokracia.com.
Përveç anës politike që Kurti për herë të parë në histori e bëri Kosovën pjesë të listës së shteteve të sanksionuara (Rusia, Koreja e Veriut dhe Irani), sanksionet po vazhdojnë të japin efektin e tyre në ekonominë e vogël të vendit tonë.
Aleanca Kosovare e Bizneseve paralajmëronte në fillim të korrikut se nga këto sanksione, Kosova rrezikon të humbasë mbi 500 milionë euro projekte.
Bizneset në Kosovë rrezikojnë të mbyllen si pasojë e sanksioneve të BE-së
Vetë Kurti e kishte pranuar në mes të muajit shtator të këtij viti se këto sanksione po dëmtojnë shtetin e Kosovës, sa i përket marrëveshjes së Stabilizim-Asociimit, kredive dhe granteve apo edhe takimeve të nivelit të lartë.
Dhe jo vetëm ky aspekt, por sanksionet e vendosura nga BE-ja për Kosovën po vazhdojnë ta mbajnë Kosovën në pozicion të rënduar ndërkombëtar. E gjithë politika e jashtme e Kosovës është kufizuar në dialogun me Serbinë dhe në përpjekje të dëshpëruara për largimin e sanksioneve të BE-së.
Ka disa muaj që presidentja Vjosa Osmani dhe kryeministri Albin Kurti janë hedhur në përpjekje e thirrje për largimin e sanksioneve të Bashkimit Evropian.
Së fundmi, më 13 dhjetor, Osmani i ka kërkuar Presidentes së Komisionit Evropian, Ursula von der Leyen, që t’i hiqen masat sanksionuese Kosovës. /Demokrcia.com/
Osmani i kërkon edhe Komisionit Evropian t’i hiqen masat Kosovës
