Shtëpia më e madhe e futbollit evropian, UEFA, ka përditësuar ranglistën e re për klubet e futbollit në kontinentin e vjetër, përfshirë edhe ato në Kosovë.

Drita mbetet klubi me më së shumti pikë në vend, duke u renditur në pozitën e 254 me 5 mijë pikë në ranglistën e UEFA-s, raporton Demokracia.com.

E dyta në ranglistë nga futbolli i Kosovës renditet Prishtina, kampionia në fuqi e Kosovës që zë vendin e 281 me 4 mijë e 250 pikë.

Llapi, Gjilani, Feronikeli e Trepça ’89 ndodhen në pozitat 397, 398, 399 dhe 400 me nga 1 mijë e 633 pikë gjithsej.

Kësisoj, Drita konfirmon edhe njëherë se për shkak të performancave dhe arritjeve në disa faza të garave evropiane mbetet klubi me arritjen më të mirë në futbollin e Kosovës që nga pranimi në dy institucionet më të larta të futbollit botëror, UEFA dhe FIFA.

Kosova është pranuar me të drejta të plota në UEFA dhe FIFA në vitin 2016, kurse Drita nga ajo kohë deri edicionin e kaluar ka marrë pjesë tri herë në garat evropiane, e paraqitja që vlen të përmendet është ajo e edicionit të fundit kur gjilanasit u eliminuan me shumë vështirësi nga gjiganti holandez i futbollit, Feyenoord me rezultat 3:2 pas dy ndeshjeve, në kuadër të fazës së dytë të kualifikimeve për Ligën e Konferencës.

“Bardhekaltrit” nga Gjilani prapa shpinës kanë lënë edhe klube të mëdha shqiptare si Partizani e Skenderbeu.

Ranglista e UEFA-s tregon se klubi shqiptar me pozitën më të lartë është Shkendija e Tetovës që ndodhet në vendin e 137 me 9 mijë pikë./Demokracia.com/