“E kemi prioritet”, tha kryeministri Albin Kurti në fillim të këtij muaji, në një postim për shëndetësinë. Por, faktet në realitet po flasin ndryshe.
Qeveria Kurti 2 filloi me ministër Arben Vitinë, i cili pas një kohe dha dorëheqje pasi kandidoi për Kryetar të Prishtinës, por pësoi humbje. Pas Vitisë, në krye të shëndetësisë erdhi Rifat Latifi, i cili qëndroi disa muaj në pozitën e ministrit e më pas dha dorëheqje. Pas tij, për afro tre muaj, si u.d e ministres ishte Dafina Gexha-Bunjaku dhe përsëri si minister u rikthye Arben Vitia.
Asnjëri prej tyre nuk ka lënë gjurmë në shëndetësi, shkruan Demokracia.com.
Siç u raportua këto ditë, Ministria e Shëndetësisë shpenzoi vetëm 8 për qind të buxhetit për investime kapitale.
Nga 24 milionë euro sa i kishte në dispozicion për vitin 2023, sipas raportit nëntëmujor të Ministrisë së Financave, për këtë kategori ajo ka shpenzuar më pak se 2 milionë euro apo vetëm 8 për qind.
Për afro tre vite nga ardhja në krye e “Kurti 2”, tri herë janë ndryshuar ministrat dhe investimet kapitale janë minimale./Demokracia.com/