“Së shpejti do t’i thërras edhe partitë opozitare në takim, që të dëgjoj, pasi që e kanë marrë edhe ata draftin, se cilat janë vlerësimet e tyre, cilat janë komentet e tyre dhe cilat janë çështjet që ata dëshirojnë që ata të sqarohen dhe do t’i inkorporoj edhe ato komente.
Natyrisht, të gjitha ato më të cilat pajtohemi dhe kemi vlerësimin e njëjtë në mënyrë që të përforcohen dhe të bashkohen zërat tanë për të gjitha ato çështje që mendojmë që të përmirësohet ky draft”.
Kjo është deklarata e Presidentes së Kosovës, Vjosa Osmani, e dhënë më 6 dhjetor 2023, kur është pyetur lidhur me komentet e saj për përmbajtjen e draftstatutit të Zajednicës apo Asociacionit të Komunave me Shumicë Serbe, shkruan Demokracia.com.
Deri më tani, ky dokument që në fillim përmban skandalin e madh, pasi i referohet Rezolutës 1244 të Këshillit të Sigurimit të OKB-së, është publikuar jozyrtarisht nga mediat e ndryshme, por vazhdon të mbahet i fshehur nga kryeministri Kurti, si bartës i dialogut në emër të Kosovës.
“Ne do të presim në momentin që ata e publikojnë drafti, nuk besoj që do të ketë ndonjë problem që të publikohen edhe komentet e institucioneve. Në momentin që dokumenti shkon në Gjykatën Kushtetuese, siç është paraparë në draftstatut, si presidente e vendit do t’i dërgojë komentet të cilat kanë për qëllim që ky draft të eliminojë disa prej këtyre paqartësive”, ka thënë Osmani.
Ky deklarim i presidentes Osmani përmban detaje të shumta, të cilat flasin për qorrsokakun në të cilin ka hyrë Republika e Kosovës, pas pranimit të Statutit të Zajednicës nga ana e kryeministrit Kurti më 21 tetor 2023, të cilin ia kanë dorëzuar 5 emisarët që përfaqësojnë ShBA-në, BE-në, Gjermaninë, Francën dhe Italinë, si dhe më 26 tetor 2023 ka shprehur gatishmëri para liderëve evropianë (Scholz, Macron, Meloni, Michel, Borrell) që të njëjtin ta nënshkruajë.
Lexo më shumë:
Lexo edhe këtë:
NË KËRKIM TË MBËSHTETJES NGA OPOZITA
Më 27 shkurt në Bruksel dhe më 18 mars në Ohër, kryeministri Albin Kurti me marrëveshjet e tij me presidentin serb, Aleksandër Vuçiq, ka tejkaluar Kushtetutën e Republikës së Kosovës.
Më i zëshmi për dëmet nga këto marrëveshje është deklaruar ish-kryetari i Gjykatës Kushtetuese, Enver Hasani, i cili ka thënë se në Marrveshjen e Brukselit/Ohrit ka dimensione që formojnë katastrofën e Kosovës.
“Kjo nënkupton që, kurdoherë, në mes të dy vendeve do të ketë biseda për statusin e Kosovës, që nënkupton se zgjidhja e këtij statusi shkon nga federalizmi i brendshëm i Kosovës deri te federalizmi me Serbinë, ose ndonjë status tjetër asimetrik, në vartësi nga raporti i forcave në Ballkan dhe më gjerë”, ka shkruar Hasani më 27 nëntor 2023.
Lexo më shumë:
Në këto rrethana, presidentja Osmani është hedhur në kërkim të mbështetjes së partive opozitare për këto marrëveshje, për të cilat opozita ka shprehur hapur kundërshtimet e saj dhe paralajmërimet për përmbajtjen e rrezikshme.
Përmes sigurimit të mbështetjes opozitare, Osmani dhe Kurti synojnë të shpërndajnë përgjegjësinë për përmbajtjen e rrezikshme të këtyre marrëveshjeve, të cilat janë rezultat i dialogimit amater 3-vjeçar të kryeministrit Kurti.
PRESIDENTJA SI “ÇANTË” PËR DEPONIMIN E KOMENTEVE TË OPOZITËS
Presidentja Osmani është vetëofruar që të shërbejë si një mbledhëse e komenteve të opozitës për draftstatutin e Zajednicës dhe që këto komente do t’i inkorporonte në listën e komenteve që tashmë ajo ka përgatitur.
Kjo gatishmëri e presidentes Osmani duket e çuditshme, pasi nëse statuti për themelimin e Zajednicës do të dërgohej në Gjykatën Kushtetuese, sipas procedurave, deputetët dhe subjektet parlamentare mund t’i deponojnë komentet e tyre në Gjykatën Kushtetuese, pa pasur nevojën që kjo të bëhet përmes një ndërmjetësuesi, në këtë rast përmes presidentes. /Demokracia.com/