Kryeministri i Kosovës, Albin Kurti, i cili është i obsesionuar me historinë, më në fund ia ka arritur të gjejë vend në të, por për të keq.
Albin Kurti është bërë kryeministri i parë në historinë e pasluftës në Kosovë, që i ndëshkon mësimdhënësit duke ua ndalë rrogën e muajit shtator vetëm pasi ishin në grevë, në kërkim të disa të drejtave, që në fund u shpërfillin nga Qeveria, shkruan Demokracia.com.
Ekzekutimi i pagave nuk është bërë as pas shtatë ditësh, ndonëse të gjithë të tjerët që paguhen nga buxheti i shtetit të Kosovës e morën rrogën e tyre më 30 shtator. Madje, edhe grevistët tjerë u paguan, por vetëm mësimdhënësit jo dhe nuk dihet as nëse do të bëhet kjo.
Ky ndëshkim, që vjen drejtpërdrejtë nga Kurti dhe i zbatuar nga vartësi i tij në Ministrinë e Financave, Hekuran Murati, është me pasoja të rënda jo vetëm për mësimdhënësit, por edhe për familjet e tyre që burim të të ardhurave kanë këto paga. Ndalja e pagës në këtë kohë krize të përballjes me inflacionin dhe çmimet e larta të çdo gjëje, është jo vetëm shkelje kushtetuese e ligjore, por edhe jo-njerëzore.
LEXO EDHE:
Pavarësisht këtyre konsekuencave, Kurti ka ndërmarrë këtë hap, si një lëvizje për të shtypur jo vetëm këtë grevë të mësimdhënësve, e cila vetëm është pezulluar deri në janar 2023, por edhe për të shtypur grevat e mundshme të ardhshme.
Beteja e kryeministrit Kurti për të shtypur grevën dhe organizimin sindikal është një pasqyrë krejt tjetër nga ajo që dikur premtonte ai si opozitar. Në vitin 2019, ai u kishte premtuar sindikatave të Kosovës se “tek Qeveria e tij do të gjejnë partnerin që nuk e kishin te asnjë Qeveri tjetër që prej përfundimit të luftës”.
LEXO EDHE:
Në vend të përmbushjes së këtij premtimi apo një mirëkuptimi për kërkesat e mësimdhënësve, kryeministri Kurti që nga dita e parë e grevës i ka sulmuar e kërcënuar se do të mbesin pa pagën mujore dhe këtë po e bënë realitet. /Demokracia.com/
