Luftanija iraniane Alborz ndodhet në Detin e Kuq, pasi ka kaluar nëpër ngushticën Bab el-Mandeb: këtë e ka raportuar agjencia gjysmëzyrtare e lajmeve iraniane Tasnim, e cila nuk ka specifikuar arsyen e pranisë së kësaj anije.
Deti i Kuq ka qenë në qendër të tensioneve, që kur rebelët Houthi të Jemenit, të mbështetur nga Irani dhe aleatë me Hamasin, filluan të sulmojnë anijet tregtare perëndimore, të konsideruara aleate të Izraelit, pas fillimit të luftës midis Izraelit dhe Hamasit.
Flota iraniane ka qenë e pranishme në zonë që nga viti 2009, “për të garantuar sigurinë e rrugëve të lundrimit dhe për të luftuar piratët, ndër të tjera”, shkruan agjencia.
Shtetet e Bashkuara janë të pranishme në zonë së bashku me aleatët e tjerë të një koalicioni ndërkombëtar që synon të mbrojë trafikun tregtar në Detin e Kuq dhe dje fundosën tre anije Houthi duke shkaktuar vdekjen e anëtarëve të ekuipazhit në bord.
