Shanset për një grusht shteti në Moskë kundër Vladimir Putinit, nga Shërbimi Federal i Sigurisë Ruse (FSB), ish-KGB, janë në rritje. Kjo është ajo që del nga disa emaile të dërguara nga një burim anonim “në zemër të inteligjencës ruse” për disidentin rus në mërgim Vladimir Osechkin, themelues i grupit të të drejtave të njeriut gulagu.net, dhe të cituar nga London Times.

Sigurisht, zëra të tillë duhet të merren me kujdes. Fakti është se sipas këtij burimi anonim, një lloj “informatorët e thellë” të shërbimeve të Moskës, kaosi dhe pakënaqësia po shtohen brenda shërbimeve sekrete, të cilat nga ana e Putinit janë vënë në dukje si përgjegjës për dështimin për të arritur qëllimin e përmbysjes së qeverisë së Kievit.

Shumica e këtyre sentimenteve rrjedhin nga pasojat e sanksioneve perëndimore ndaj vetë agjentëve të FSB-së, të konsideruar nga shumë si “fisnikëria e re” e Moskës dhe të cilët nuk mund të “shkonin më me pushime në vilat e tyre në Itali ose t’i çonin fëmijët e tyre në Disneyland në Paris”.

Vladimir Osechkin shpjegoi për gazetën britanike: “Për njëzet vjet Putin ka krijuar stabilitet në Rusi. Zyrtarët e shërbimeve sekrete, policia, magjistratët, të gjithë këta njerëz brenda sistemit të pushtetit kanë qenë në gjendje të jetojnë mirë. Por tani e gjithë kjo është e humbur… Ata e kuptojnë se kjo luftë është një katastrofë për ekonominë, për njerëzimin. Ata nuk duan të kthehen në kohën e Bashkimit Sovjetik”,

Mes emaileve të marra nga Osechkin, që besohet se janë autentike nga disa ekspertë të inteligjencës ruse, në datën 4 mars, burimi anonim e përshkruan luftën si “një dështim total”, të krahasueshëm vetëm me rënien e Gjermanisë naziste. Më 11 mars, dy drejtues të FSB-së u arrestuan dhe u vunë në arrest shtëpiak, njëzet agjentë të tjerë iu nënshtruan kontrolleve. Burimi anonim nuk është në mesin e tyre, por ai i kërkoi Osechkin “të dërgojë përshëndetjet e mia për të gjithë”.