Mjeku Xhihan Abazoviq, vëllau i kryeministrit në largim të Malit të Zi, Dritan Abazoviq iu përgjigj shumë pyetjeve të diskutueshme që lindën pas hapjes së një spitali privat në Beograd – kush është pronari i vërtetë, kush i dha paratë, por edhe për marrëdhëniet me Milica Gjurgiqin, partneren e Ana Brnabiqit.

“Pronari i Spitalit BioCell është Vincula Biotech Group, i cili është themeluar në vitin 2015 dhe pronari i shumicës së aksioneve është kompania Ensifolia, e regjistruar në Qipro, e cila është themeluar nga mjekët. Kjo kompani fillimisht është formuar nga profesori Aleksandar Ljubiq dhe unë. Kjo nuk ka të bëjë me financat, por me një ide të përbashkët”, ka shpjeguar mjeku.

Ai thotë se kanë vetëm një investitor financiar, Milija Baboviq, përmes kompanisë së tij “Robne Kuće Beograd”, raporton nova.rs.

“Njerëzit që ndërtuan këtë pallat, që nuk është pronë e jona, por hapësirë me qira, një pjesë të mirë na e dhanë me këste, pjesën tjetër që lidhet me pajisjet i mbuloi Raiffeisen leasing dhe kompania Metronik, partner strategjik i së cilës jemi, financoi sallat operative. Kur të mblidhet gjithçka, është një investim nga tetë deri në nëntë milionë euro”, thotë Abazoviq.

Duke folur për lidhjen me Milica Gjurgiqin, partneren e kryeministres serbe, Ana Brnabiq, me të cilën punon, ai thotë se ka dashur të ketë në spital një mjeke të re me përvojë dhe meqë Milicën e njeh nga universiteti, ka qenë e logjikshme ta zgjedhë atë.

Kur e pyesin se çfarë e bën të ndihet keq në lidhje me pyetjet se kush është pronari dhe nga vijnë paratë, apo pretendimet se klinika i është bërë dhuratë për disa koncesione, ai përgjigjet se “Deri dje kam qenë një njeri i respektuar ndërsa sot po llogaritëm sikurse nuk e kam mbaruar fakultetin e mjekësisë dhe sikur nuk e kam drejtuar këtë spital para një institucioni shëndetësor privat në Ulqin prej nga jam unë dhe kohë kur vëllai im ndoshta ishte në vitin e parë të studimeve apo edhe në shkollë të mesme. Dhe për të përmendur, kur nisi ky projekt spitalor, ishte në vitin 2018, vëllai im ishte në opozitë. U konsultova me të dhe më tha se çfarëdo që të më pyesë dikush, duhet të përgjigjem ashtu siç është”.

Duke komentuar spekulimet në opinion që e lidhin hapjen e spitalit me afrimin e qeverisë së Abazoviqit dhe Beogradit zyrtar, ai u përgjigj se projekti ka filluar më herët. “Nëse dikush në botë mund ta ndërtojë projektin e spitalit nga gushti i vitit 2020, kur u formua Qeveria e Malit të Zi, e deri më tani, unë i heq kapelën”.

Ai thotë për vëllain e tij se ka qenë gjithmonë një rebel i vërtetë, të cilin kanë dashur ta përjashtojnë nga shkolla fillore. “Ai gjithmonë ka luftuar për të drejtat e dikujt. Ai kishte problem me qeverisjen, jo sepse ishte rastësor, por sepse vazhdimisht rebelohej dhe luftonte për të drejtat e dikujt”, pohoi ai.