Ndonëse janë objekte ku banorët e Kosovës orientoheni për të kërkuar ndihmë mjekësore, spitalet e Kosovës muajve të fundit janë bërë qendër për hetime për raste të ndryshme.

Lajmi për vdekjen e katër vjeçares në Gjakovë shokoi opinionin publik në Kosovë. Reagimi ishte i ashpër karshi sistemit shëndetësor.

Por rastet si kjo duket se nuk janë të rralla nëpër spitalet e Kosovës.

Situatë tronditëse ishte para një viti në Pejë, ku një bebe ishte futur në lavatriqe.

Tash kur janë bërë një vit nga ky raste tragjik, përgjigje nuk ka nga Prokuroria e Pejës.

Derisa ka heshtje për ketë rast, në qershor të 2023 një familje nga Prizreni, kishte akuzuar spitalin e kësaj komune për vdekjen e foshnjës së porsalindur.

Nga Prokuroria e Prizrenit, shkurt thonë se rasti po hetohet pa dhënë detaje se sa persona janë në fazën e hetimeve.

“Referuar kërkesës tuaj për informacione, ju njoftojmë se rasti në fjalë aktualisht ndodhet në fazën e hetimeve. Për shkak të konfidencialitetit të procedurës dhe ndjeshmërisë së rastit, nuk mund t’ju japim detaje të tjera”, ka thënë Prokuroria në Prizren për TV Dukagjinin.

Shqetësuese këto rast po i shohin nga Shoqata e Pacientëve, të cilët hedhin edhe kritika për mos marrje të licencës deri tash të asnjë zyrtari shëndetësor.

“Aktualisht unë nuk njoh i është ndonjë mjeku licenca edhe është në shtëpi. Vite më parë ka ndodhë në spitalin e  Gjakovës që ju pat marr licenca për gjashtë muaj por i njëjti kishte punuar në spitale private dhe ekzekutimi i sanksioneve ndaj mjekeve nuk ka ndonjë efekt të madh”, ka thënë Besim Kodra nga Shoqata e Pacientëve.

Përveç mos ndëshkimit nga institucionet e shëndetësisë, asnjëri nga rastet e mjekëve nuk kanë një përfundim as në sistemin e drejtësisë.

Gëzim Shala nga IKD, thotë se janë disa arsye pse këto raste po zvarriten.

“Janë disa arsye pse vjen deri të një kohëzgjatje e një rasti, fillimisht afatet e përcaktuara ku hetimi sipas kodit të procedurës penale mund të zgjasin deri në tri vite por jo domesdoshmerisht prokuroria duhet të pres atë periudhë”, ka përfunduar Gëzim Shala.

Jo vetëm këto raste por edhe shumë të tjera po presin përgjigjen nga institucionet e drejtësisë, për pretendimet se nga stafi mjekësor e shëndetësor ka pasur neglizhencë gjatë kryerjes së detyrës së tyre.