Rusia po vazhdon edhe më tutje me propagandë. Së fundi, shteti që po kryen agresion ndaj Ukrainës ka pretenduar se që prej nisjes së luftës, nga Kosova atje kanë shkuar rreth 190 mercenarë për të luftuar.
Ministria e Mbrojtjes ruse, në disa “të dhëna” të publikuara së fundi, pretendon se 84 mercenarë nga Kosova janë vrarë tashmë.
Njëjtë, Rusia pretendon se edhe nga Shqipëria kanë arritur rreth 192 mercenarë dhe se janë vrarë 87.
Në këtë listë, Rusia ka përfshirë edhe shtete të tjera nga të cilat pretendon se ka mercenarë si Polonia, Bosnja e Hercegovina, Kanadaja, ShBA-ja e të tjera.
Vlen të përmendet, se kjo nuk është hera e parë që Rusia bën një propagandë të tillë që prej kur ka nisur luftën në Ukrainë.
Ish-ministri shqiptar i Mbrojtjes, Pandeli Majko kishte demantuar këto pretendime të Rusisë.
“Sergei Lavrov, Ministri i Jashtëm i Federatës Ruse ka bërë sot një deklarim të paprecedentë për “mercenarë” shqiptarë nga Shqipëria dhe Kosova të cilët po dërgohen në zonën e Donbasit në Ukrainë. Përpara se Ambasada e Federatës Ruse në Tiranë të japë shpjegime (në se do ta bëjë)… Kanali Televiziv WION i Indisë ka bërë një kronikë të veçantë për “hartën” e përkatësisë nacionale të vullnetarëve që kanë shkuar për të ndihmuar Ukrainën.” – kishte thënë ai.
