“Lutja” nr.1 e Kurtit
Kryeministri i Kosovës, Albin Kurti me 27 korrik kërkoi mirënjohje nga Bashkimi Evropian për progresin ekonomik dhe demokatik të vendit.
Konkretisht, Kurti atë ditë ka kërkuar heqjen e masave ndëshkuese.
“Ka dakordim midis zëvendëskryeministrit Bislimi dhe emisarit evropian Lajçak, por ky dakordim i tyre në Bratislavë do të duhej të bëhej qëndrim i BE-së. Ne konsiderojmë që Kosova me progresin e saj ekonomik dhe demokratik do të duhej të kishte mirënjohjen e BE-së edhe kurrfarë masash ndëshkuese. Sa më herët që merret vesh një gjë e tillë, natyrisht që është më mirë për të gjithë”, tha Kurti.
“Lutja” nr.2 e Kurtit
Kërkesa e dytë e shefit të ekzekutivit kosovar për heqjen e masave ndëshkuese nga BE ka ardhur me 26 korrik.
Kurti në këtë datë ka kërkuar heqjen e masave ndëshkuese, duke thënë se këto masa janë quajtur fillimisht si masa të përkohshme dhe të kthyeshme.
“Ne jemi duke u përgatitur që të kemi zgjedhje të parakohshme në veri të Kosovës ndërkaq për këto masat që janë marrë ndaj neve e të cilat janë quajtur edhe të përkohshme, edhe të kthyeshme, natyrisht që presim që ato të hiqen sa më parë dhe është e logjikshme që kjo do të ndodhë paraprakisht. Pra, nuk bëhet fjalë për kushtëzime, por për rendin logjik të gjërave që duhet ta ketë si hap të parë zbatimin e dakordimit ndërmjet Bislimit dhe Lajçakut … dhe që natyrisht e krijon atë normalitetin minimal për zgjedhje të parakohshme”, ka thënë ai.
Lutja nr.1 e Bislimit
Dy javë me parë, kryenegociatori i Kosovës në dialogun me Serbinë, Besnik Bislimi, ka shprehur zhgënjim për mos fillimin e procedurave të largimit të masave të vendosura nga Bashkimi Evropian si ndëshkim për tensionet në veri të vendit.
Bislimi ka thënë se në marrëveshjen e nënshkruar në Bratisllavë mes tij dhe Lajçakut, të quajtur “Aranzhime mes Kosovës dhe BE-së për implementimin e qëndrimit të 27 vende anëtare të BE-së”, ishte e qartë se kjo marrëveshje kishte të bënte me zbatimin e kërkesave të BE-së dhe largimin e masave të vendosura nga BE-ja.
Bislimi theksoi se institucionet vendore të Kosovës kanë pritur një reagim më të shpejtë dhe të qartë nga BE-ja lidhur me largimin e masave, duke shpresuar që ky proces të vazhdojë pa vonesa dhe të sjellë përparim në dialogun e tyre me Serbinë.
“Për ne ka qenë e qartë se kjo është mënyra e tërheqjes së masave të BE-së që janë vendosur ndaj Kosovës, dhe për ne është habi se edhe tetë ditë pas dakordimit ende nuk kemi një letër sqaruese nga Borrell që të kërkojë largimin e masave nga Komisioni Evropian”, ka pohuar Bislimi.
Përgjigjja e BE-së
Peter Stano, zëdhënës i Bashkimit Evropian, në një konferencë të Përfaqëuesit të Lartë, Josep Borell, ka njoftuar se ky i fundit dhe përfaqësuesit e tjerë të BE-së do të shkojnë në pushime deri në fund të gushtit në Toledo.
“Kaq ishte për sot dhe deri në rinisjen e punës pas pushimeve të verës, Përfaqësuesi i Lartë duhet të fluturojë, duhet të shkojë. Kështu që faliminderit shumë gazetarëve. Paqit një verë të mirë dhe me shpresë shihemi në Toledo në fund të gushtit”, ka thënë Stano.