Ministrja e Drejtësisë, Albulena Haxhiu, ka bërë të ditur se bashkëkombësit dhe shtetasit e huaj tani kanë mundësinë e fitimit të së drejtës së pronësisë mbi pronat e paluajtshme në Kosovë.

Siç ka njoftuar ajo nëpërmjet një postimi në rrjetin social Facebook, vendimi është marrë pas nënshkrimit të Rregullores për Procedurën e Përcaktimit dhe Verifikimit të Reciprocitetit.

Sipas saj, rregullorja e re ka për qëllim të sigurojë që të gjithë bashkëkombësit e Kosovës dhe shtetasit e huaj të kenë mundësinë legjitime për të fituar pronësi mbi pronat e paluajtshme në territorin e Kosovës.

Siç ka thënë ministrja Haxhiu, autoriteti kompetent do të zbatohet në përputhje me rregullat specifike të përcaktuara me këtë akt nënligjor.

“Nga sot, me nënshkrimin e Rregullores për Procedurën e Përcaktimit dhe Verifikimit të Reciprocitetit, bashkëkombësit tanë të cilët duan të fitojnë të drejtën e pronësisë mbi pronat e paluajtshme, por edhe investitorët e huaj e subjektet tjera, do të mund ta realizojnë këtë të drejtë pranë autoritetit kompetent sipas rregullave të përcaktuara me këtë akt nënligjor”, ka shkruar Haxhiu në Facebook.

“E drejta për posedim të pronës tashmë po rregullohet asisoj në mënyrë që të mos privohen bashkatdhetarët tanë dhe në anën tjetër të krijohen kushte më të përshtatshme për investitorët nga jashtë”, ka thënë tutje ministrja Haxhiu.