Ministria e Mbrojtjes ka blerë, në mesin e pajisjeve digjitale të një kontrate, edhe dy telefona të markës ‘iPhone 14 Pro Max’ 1 TB, që në treg vetëm një copë kushton 2,443 euro. Nga kjo ministri kanë thënë se ata do të përdoren për nevoja të Zyrës për Marrëdhënie me Publikun.
Në një përgjigje nëpërmjet e-mailit për Demokracia.com, nga ky institucion kanë thënë se këta telefona janë blerë me qëllim të zëvendësimit të aparatit fotografik.
“Telefonat janë blerë për nevojat e Zyrës për Marrëdhënie me Publikun (ZMP). Telefonat janë kërkuar që të jenë të kualitetit të lartë, që të zëvendësojnë punën e një aparati fotografik dhe të një kamere televizive në rrethana të caktuara dhe kushte të terrenit”, bëri të ditur Ministria e Mbrojtjes për Demokracia.com.
Përveç telefonave, nga kjo kontratë do të blihen edhe aparatë fotografikë, laptopë për montimin e videove, kompjuterë, dronë për terren, video kamera, etj.
Sipas dosjes së kontratës të publikuar në KRPP, këto pajisje do të blihen për nevojat e Zyrës për Marrëdhënie me Publikun.
Siç bëhet e ditur në kontratën e publikuar në KRPP, tenderin për “Furnizim me pajisje digjitale për nevojat e ZMP-së MM-së”, e ka fituar kompania “INFINITT” SH.P.K.
Për këtë kontratë, ministria ka dhënë hiç më pak se 59 mijë e 487 euro. /Demokracia.com/
