Verdikti i Gjykatës u harrua nga Komiteti i Aksionarëve të Stacionit të Autobusëve në Prishtinë, edhe pse kanë kaluar vetëm pesë muaj që nga dita kur u pezullua çdo vendim e veprim lidhur me bordin drejtues të këtij stacioni.
Bordi i ri, por me të përzgjedhurit e vjetër, u formua në tetor të këtij viti dhe vetëm një muaj pas, ata u takuan për mbledhjen e parë jolegjitime, raporton Kiks Kosova.
Rikujtimi i vendimit të Gjykatës nga kryetari i Sindikatës nuk pati asnjë ndikim në parandalimin e kësaj mbledhjeje.
Ankesa lidhur me situatën e krijuar patën edhe punëtorë të tjerë.
Që mbledhja të zhvillohej pa asnjë ndikim nga jashtë, u përkujdes edhe Policia e Kosovës.
Këta të fundit aty ishin vetëm për çështje sigurie, ani pse vendimi i Gjykatës e ndalonte një mbledhje të tillë.
Të heshtur para mikrofonit të KIKS-it qëndruan edhe pjesëtarët e këtij bordi.
Të rrethuar me policë, ata lanë objektin e stacionit, duke shmangur kontaktin me çdo person.