Kualifikimi i përfaqësueses së Kosovës në hendboll në Kampionatin Evropian të vitit 2024 duket thuajse i pamundur, shumë kohë para se të nisin kualifikimet. Të enjten në Zuerich të Zvicrës është tërhequr shorti i kualifikimeve për Evropianin e hendbollisteve, ndërsa Kosova ka rënë në një grup shumë të fortë. Kosova është në grupin e tetë së bashku me Danimarkën dhe Poloninë. Danimarka është superfuqi në hendbollin e femrave.
Në Evropianin e vitit të kaluar u paraqit në finale, ndërsa në Botërorin e vitit 2021 ishte e treta. Danezet i kanë tri medalje të arta olimpike, gjashtë medalje të arta botërore, prej tyre një të artë, si dhe gjashtë medalje evropiane.
Në Evropian, Danimarka tri herë ishte kampione e tri herë nënkampione. Kështu që gjasat e Kosovës ndaj Danimarkës thuajse nuk ekzistojnë. Me Poloninë, Kosova luajti së fundi dy ndeshje. Humbi thellë në fazën e dytë kualifikuese për Botërorin 2023. Kosovës i duhet të fitojë pikë ndaj Danimarkës apo Poloninë për t’u kualifikuar. Por kjo duket gati e pamundur aktualisht. Grupi i tetë është i vetmi me tri përfaqësuese.
Shtatë grupet tjera i kanë nga katër ekipe përfaqësuese. Dy të parët në secilin grup kualifikohen në Euro 2024, ndërsa biletën e sigurojnë edhe katër prej tetë ekipeve më të mira që përfundojnë në vendin e tretë. Kosova do të jetë e treta, por i duhet të jetë prej katër më të mirave nga kjo pozitë për të shkuar në Evropian. Kualifikimet nisin në tetor, ndërsa Evropiani mbahet në Austri, Hungari e Zvicër. Për herë të parë Kosova ishte në vazon e tretë për short. Megjithatë fati i mungoi plotësisht.
