Një këshilltar i presidentit Volodymyr Zelensky ka thënë se “pavendosmëria” e Perëndimit për dërgimin e armëve shtesë në Ukrainë “po vret më shumë nga njerëzit tanë”.

“Çdo ditë vonesë është vdekje e ukrainasve”, shkroi Mykhailo Podolyak në Twitter.

Deklaratat e tij vijnë pasi ministri i mbrojtjes i Ukrainës tha se kishte një “diskutim të sinqertë” me homologun e tij gjerman për tanket gjermane Leopard 2, të cilat Kievi po i kërkon urgjentisht për t’u përballur me artilerinë ruse, shkruan BBC.

Gjermania ka këmbëngulur se nuk është duke bllokuar dërgimin e tankeve Leopard të prodhimit gjerman, të cilat vendet e tjera duan të dërgojnë.

“Ne patëm një diskutim të sinqertë mbi Leopards 2”, tha Oleksii Reznikov pas takimit me aleatët perëndimorë të premten.

Takimi në bazën ajrore Ramstein në Gjermani solli një marrëveshje për furnizimin e më shumë automjeteve të blinduara, sistemeve të mbrojtjes ajrore dhe municioneve.

Të shtunën, një këshilltar i Reznikov i tha BBC-së se vendet e NATO-s të përkushtuara për të ndihmuar Ukrainën duhet të jenë disa hapa përpara armikut.

Yuriy Sak tha se Perëndimi duhet të ripërcaktojë se çfarë do të thotë të qëndrosh me Ukrainën – dhe se kjo nuk do të thotë thjesht stabilizim i vijës së parë të Ukrainës.

“Të jemi në gjendje të mbrojmë tokën tonë do të thotë të jemi në gjendje të de-okupojmë tokën tonë, të çlirojmë territoret tona dhe për këtë kemi nevojë për tanke të rënda, për këtë kemi nevojë për mjete të blinduara”, tha ai.

Tanket Leopard 2 shihen si një ndryshuese të mundshme të lojës për Ukrainën, pasi janë të lehta për t’u mirëmbajtur dhe të projektuara posaçërisht për të konkurruar me tanket ruse T-90, të cilat po përdoren në pushtimin në Ukrainë.