Vrasja e dyshuar e dy ukrainasve nga një rus në Gjermaninë jugore po hetohet për një motiv të mundshëm politik, thanë prokurorët të hënën, sipas Agence France-Presse (AFP).

Zyra e prokurorit publik në Mynih, përgjegjëse për hetimin e krimeve të motivuara politikisht, ka marrë përsipër rastin sepse një motiv i tillë “nuk mund të përjashtohet”, tha një zëdhënës për AFP.

Një i dyshuar rus 57-vjeçar u arrestua pasi dy burrat ukrainas u gjetën me plagë me thikë në një qendër tregtare në qytetin bavarez të Murnau të shtunën në mbrëmje. Rrethanat mbeten të paqarta, sipas hetuesve.

Dy viktimat e moshës 36 dhe 23 vjeç ishin ushtarë ukrainas që ndodheshin në Gjermani për rehabilitim mjekësor, sipas Ministrisë së Jashtme në Kiev, shkruan The Guardian.

I dyshuari është arrestuar të shtunën në banesën e tij jo shumë larg vendit të ngjarjes dhe mbetet në paraburgim, raporton AFP.

Ministri i Jashtëm Dmytro Kuleba falënderoi hetuesit gjermanë për arrestimin e shpejtë.

Ministri i Brendshëm i Bavarisë, Joachim Hermann tha të dielën se nuk kishte indikacione se krimi ishte një “reflektim i konfliktit midis Rusisë dhe Ukrainës”, sipas gazetës Sueddeutsche Zeitung.

Dëshmitarët thanë se tre burrat ishin parë së bashku në qytet përpara incidentit dhe kishin pirë shumë alkool, tha gazeta.