Ishte ndër masakrat më të mëdha në Kosovë. 53 shqiptarë u masakruan dhe më pas u dogjën nga forcat serbe brenda një shtëpie në fshatin Poklek i Vjetër të Drenasit. Më 17 prill të vitit 1999, fëmijë, gra, pleq e burra të tri familjeve Muqolli, Elshani dhe Carraku, u shuan përgjithmonë vetëm pse ishin shqiptarë.
Demokracia.com ka qëndruar në vendin ku ishte kryer kjo masakër e tmerrshme, në shtëpinë që tashmë është kthyer në muze, ku gjurmët ende duken të freskëta.
Në një rrëfim ekskluziv për tmerrin e 17 prillit të vitit 1999, ish-luftëtari i UÇK-së, Fadil Muqolli, për Demokracia.com ka folur për 53 të vrarët që fillimisht u ekzekutuan e më pas u dogjën trupat e tyre.
“Ajo që ndodhi dy dekada më parë nuk mund të harrohet. Dëshmitë e krimeve të Serbisë janë të ruajtura në këtë shtëpi ku 53 anëtarë të familjeve Muqolli, Elshani dhe Carraku u ekzekutuan. Unë i kam humbur 14 anëtarë të familjes së ngushtë, babën, nënën, bashkëshorten, vajzën dhe 3 djemtë”, tregon Muqolli mes lotëve tmerrin e asaj dite.
Shtëpia muze e Fadil Muqollit është e mbushur me historinë më të tmerrshme të krimeve serbe, ku gjaku në mure, rrobat e familjarëve, fletoret, librat e çanta e djalit të tij ende ruhen. Aty ende qëndron karroca e foshnjës, si dhe shumë fakte tjera që janë pjesë e këtij muzeu, si dëshmi e përjetshme e krimit të forcave ushtarake dhe paramilitare të Serbisë.
Fadil Muqolli më shumë dashuri e ruan edhe fletoren e vajzës së tij, ku në njërën faqe është shkruar eseja e saj për pranverën e thyer të vitit 1999.
Në këtë masakër u vranë pleq, burra e gra, por në mesin e tyre ishte edhe foshnja e familjes Muqolli, Liria, e cila përkundër emrit të saj nuk arriti ta kuptoi vlerën e emrit që e mbante.
Fadili shpreson se dhoma e mbushur me fotografitë e të masakruarve, dëshmitë e eshtrave të familjes Muqolli, Carraku, Elshani, do të shërbejnë për vetëdijesimin e të gjithëve për krimet e kryera nga Serbia.
“Për 23 vjet nuk pati drejtësi për këtë masakër, sepse nuk i besoj as bashkësisë ndërkombëtare. Nuk po gjykohen kriminelët serbë dhe as drejtësia në Kosovë nuk ka mundësi që t’i hetoj këto krime. Gjurmët, faktet e dëshmitë e luftës po zhduken. Po vdesin dëshmitarët e gjallë e historinë ku e kemi?”, thekson Fadili i mërzitur.
Ai i bën apel institucioneve të Kosovës qa ta vizitojnë këtë dëshmi të luftës dhe të hetohen krimet serbe të kryera në Kosovë.
“I bëjë apel institucioneve që ta vizitojnë këtë masakër të familjes sime, jemi harruar nga institucionet, askush nuk na viziton vetëm në përvjetore vijnë. Përpos gazetarëve që na vizitojnë”, thotë Muqolli. /Elmedina Ballazhi – Demokracia.com/