Kievi rezervon të drejtën për t’u hakmarrë kundër Polonisë nëse ajo nuk i bind fermerët protestues të ndalojnë bllokimin e pikave kufitare, tha të premten kryeministri ukrainas Denis Shmigal.

Fermerët polakë akuzojnë Kievin dhe Varshavën se po kërcënojnë jetesën e tyre duke lejuar importin e drithit të lirë ukrainas dhe produkteve të tjera bujqësore.

“Çështja e bllokimit të kufirit duhet të zgjidhet përpara 28 marsit – datë kur qeveritë e Ukrainës dhe Polonisë do të mbajnë një seancë të përbashkët”, shkroi Shmigal në Telegram. “Nëse kjo nuk ndodh, Ukraina do të rezervojë të drejtën për të miratuar masa reciproke në lidhje me pikat e hyrjes”, theksoi ai.

Polonia është një nga mbështetësit më të zëshëm të Ukrainës në Evropë dhe e ka furnizuar Kievin me sisteme të shumta armësh, duke përfshirë edhe tanke. Megjithatë përplasja për grurin ka shkaktuar një përçarje të konsiderueshme midis fqinjëve, me presidentin polak Andrzej Duda që akuzoi Ukrainën vjeshtën e kaluar se “përmbyti” vendin e tij me prodhime të lira.