Zyrtari i PDK-së, Bekim Çollaku beson se më në fund Partia Demokratike e Kosovës ka krijuar një stabilitet dhe ka nisur reformat.

Ai në emisionin “Blic Interview” ka theksuar se PDK edhe pse partia më e madhe opozitare në vend, megjithatë, me numrat e saj në raport me shumicën parlamentare është shumë e vogël.

Çollaku tha se i takon liderit të partisë, Memli Krasniqi që ta bind qytetarin e Kosovës se PDK do të qeverisë më mirë vendin.

“Dhe këtë do ta bëjmë në proces e sipër”, tha ai.

Ai tha se lëshimet dhe gabimet nga qeverisja e kaluar e PDK-së, kanë lënë shenja dhe shton se “megjithatë PDK është e gatshme t’i ofrojë vendit një qeverisje të duhur”.

Çollaku ka theksuar se krijimi i Gjykatës Speciale i ka vënë një barrë tepër të madhe Kosovës, dhe se kjo gykatë ka qenë një imponim ndërkombëtar.