Në fund të një grope të madhe në Kinë, u gjet një pyll i lashtë, me pemë deri në 40 metra të larta. Shkencëtarët besojnë se specie të panjohura më parë të kafshëve dhe bimëve mund të gjenden atje.

Studiuesit e shpellave në rajonin Guangxi të Kinës jugore kanë paralajmëruar shkencëtarët se kanë gjetur një gropë në të cilën ndodhet një pyll i madh. Është 306 metra e gjatë, 150 metra e gjerë dhe 192 metra e thellë, shkruan The Guardian.

Gjeologu Zhang Yuanhai i Shërbimit Gjeologjik të Kinës tha për agjencinë shtetërore të lajmeve Xinhua se vendi ka tri shpella dhe një pyll të lashtë të ruajtur mirë në fund.

“Unë nuk do të habitesha nëse do të kishte specie në ato shpella që nuk janë zbuluar kurrë më parë”, tha Chen Lixin, i cili drejtoi ekspeditën e shkencëtarëve që e panë nga afër.