Ish-oficeri i Ushtrisë Britanike Douglas Young tha në gjyqin për krime lufte dhe krime kundër njerëzimit të Hashim Thaçit dhe tre të pandehurve të tjerë bashkë me të në Dhomat e Specializuara të Kosovës në Hagë të mërkurën dhe të enjten se Ushtria Çlirimtare e Kosovës nuk ishte e organizuar si një ushtri standarde.

Young konfirmoi atë që thuhej në një raport të OSBE-së për strukturën e UÇK-së në shkurt 1999, i cili pretendonte se monitorimi i forcës guerile ishte i vështirë për shkak të mungesës së detajeve konkrete për strukturën e saj, në krahasim me forcat e armatosura serbe.

Young i tha gjykatës të enjten se forca guerile u përpoq të dukej si një ushtri e strukturuar “për ta paraqitur UÇK-në në mënyrën më të mirë të mundshme para organizatave ndërkombëtare. Sa më e mirë të jetë organizata, aq më efikase do të ishin marrëdhëniet e tyre.”

Megjithatë, në realitet ajo nuk kishte një strukturë apo hierarki moderne ushtrie, tha ai.

Thaçi, Kadri Veseli, Rexhep Selimi dhe Jakup Krasniqi akuzohen se kanë përgjegjësi individuale dhe komanduese për krime që janë kryer kryesisht ndaj të burgosurve të mbajtur në burgjet e UÇK-së në Kosovë dhe Shqipërinë fqinje, përfshirë 102 vrasje.

Të pandehurit dyshohet se i kryen krimet midis të paktën marsit 1998 dhe shtatorit 1999, gjatë dhe menjëherë pas luftës me forcat serbe. Ata janë vetëdeklaruar të pafajshëm për të gjitha akuzat.

Dëshmitari shërbeu si nënkolonel rezervist në Ushtrinë Britanike dhe në vitet 1998-1999 ai u vendos si pjesë e misionit të vëzhguesve diplomatikë të OSBE-së në Kosovë.

Young u largua nga Kosova në mars 1999 para se të fillonin bombardimet e NATO-s në Jugosllavi, të cilat i dhanë fund luftës. Ai u kthye disa vite më vonë, duke shërbyer me misionin paqeruajtës të NATO-s në Kosovë, KFOR, nga viti 2001 deri në prill 2002.

Të mërkurën, Young tha në gjykatë se UÇK-ja “nuk mund të krahasohet, për shembull, me një ushtri moderne që kontrollon territorin e saj”.

Ai i përshkroi luftëtarët e UÇK-së si me “karakter të fortë kombëtar dhe ndjenja patriotike” dhe tha për vetë forcën guerile: “Ishte një organizatë e disiplinuar, me njerëz të përkushtuar ndaj njëri-tjetrit dhe për të ardhmes.”

Gjyqi do të vazhdojë më 25 shtator./balkaninsight.com/