Sot janë publikuar rezultatet e testit PISA, ku nxënësit e Kosovës sërish kanë performuar keq, duke e rënditur në vendin e 76 nga 80 vende sa u testuan.
Sa ishte në opozitë,Lëvizja Vetëvendosje, që sot është në pushtet, ishte jashtëzakonisht e ashpër pas publikimeve të testit PISA.
Madje, si transmetonte Telegrafi, VV thërrësnin konferencë për media, ku kritikonin rezultatet e vlerësimit ndërkombëtar të arsimit, pra testit PISA.
Në konferencë, Mytaher Haskuka, që ishte deputet i VV-së e më vonë kryetar i Prizrenit, vlerësonte se nxënësit e Kosovës janë katër vite prapa krahasur me nxënësit e tjerë në aspektin e dijes.
Atëbotë, më saktë shtatë vite më parë, Haskuka paralajmëronte një seancë të jashtëzakonshme në Kuvendin e Kosovës.