Shoqata e gastronomëve të Kosovës ka reaguar për vendimin e qeverisë, për ndarjen e 3 milionë eurove për këtë kategori, si pasojë e humbjeve gjatë pandemisë.

Ata përmes një postimi në Facebook kanë reaguar, kundër këtij vendimi, duke thënë se tre milionë euro nuk do të mjaftonin as për të paguar gjobat e shqiptuara gjatë pandemisë, shkruan Demokracia.com.

Sipas shoqatës, këto mjete janë të papranueshme dhe nënçmuese.

Kjo shoqatë e ka cilësuar sektorin e gastronomisë si sektorin që bënë punësimin më të madh, në Kosovë.

Reagimi i plotë, pa ndërhyrje:

AS 3 MILIONË PËR SEKTORIN E 3TË QË MË SË SHUMTI PUNËSON?

Neni 11 i Ligjit për Rimëkëmbjen Ekonomike, parasheh përkrahjen e të gjitha bizneseve të cilat kanë qenë të mbyllura apo kanë pasur problem të funksionimit të rregullt gjatë kohës së pandemisë, me 200 milionë euro.

Për t’u zbatuar ky Ligj, Qeveria e Republikës së Kosovës me dt. 14 Janar, ka aprovuar masat e Programit të Rimëkëmbjes Ekonomike, në vlerë prej 222,4 milionë euro. Në këtë vendim, ka masa që ndajnë mjete financiare për Ministrinë e Arsimit dhe Shkencës, Ministrinë e Kulturës, Rinisë dhe Sporteve, Zyrën e Kryeministrit, Ministrinë e Shëndetësisë, Ministrinë e Bujqësisë, Ministrinë e Financave, Ministrinë e Zhvillimit Rajonal, Komunat, shtesat mbi paga, blerja e vaksinave Anti-COVID-19, etj. Pra, sipas QK, të gjitha këto masa vlejnë për rimëkëmbje ekonomike.

Në masën 8 të këtij vendimi, kemi ndarjen e mjeteve në shumë prej 9 milionë euro për ndërmarrjet në Kosovë, dhe nga kjo shumë, kemi ndarje prej 3 milionë euro për subvencionimin e sektorëve më të prekur për ndalimin e aktiviteteve të cilat janë: gastronomia, sallat e dasmave, sallat e sportit, qendrat rehabilituese dhe të ngjashme. Pra, janë të përfshira disa kategori të ndryshme në një linjë të përbashkët.

Një gjë tjetër që është me rëndësi është që Ligji mbi ndarjet buxhetore nuk i parasheh linjat e saj në përputhshmëri me Ligjin për Rimëkëmbjen Ekonomike. Si do të zbatojë QK, vetëm nenin 11 të këtij Ligji, pa u thelluar shumë tek pagat për punëtorët që kanë humbur punën si pasojë e  pandemisë për më shumë se tre muaj, ku përafërsisht në të kualifikohen rreth 40,000 punëtorë, e vetëm në gastronomi janë diku rreth 11,000 punëtorë, ndërsa QK për këtë kategori i ka ndarë 10 milionë, që mbulojnë përkatësisht 11,111 punëtorë me nga 900 euro për 3 muaj.

Ligji për Rimëkëmbjen Ekonomike do të jetë në fuqi deri më 31 dhjetor 2021. A mund të zbatohet deri atëherë ky Ligj në tërësi nga QK, duke ditur që shumica e masave të Vendimit të fundit nuk janë as të përfshira në të?

3 milionë euro edhe po të ishin të gjitha për gastronomi, nuk do të mjaftonin as për të paguar gjobat e shqiptuara gjatë pandemisë, e lëre më të paguhen shpenzimet operative me to. Këto mjete janë të papranueshme për ne, e aq më tepër janë nënçmuese!. /Demokracia.com/

https://www.facebook.com/Gastronometeprishtines/posts/1159763444457778