Shefi i zyrës së BE-së në Kosovë, Tomas Szunyog pret që të formohen sa më shpejt institucionet e Kosovës.

Përmes një shkrimi në llogarinë e tij zyrtare në Twitter shefi i BE-së në Kosovë, Tomas Szunyog ka vlerësuar Komisionin Qendror të Zgjedhjeve (KQZ), për certifikim e rezultatit zgjedhor, duke shtuar se pret formimin sa më të shpejt të institucioneve.

“E vlerësoj që KQZ ishte në gjendje të certifikonte rezultatet e zgjedhjeve për më pak se një muaj pas ditës së zgjedhjeve. Pres që institucionet e Kosovës (parlamenti, qeveria dhe presidenti) të formohen së shpejti dhe të fillojnë të punojnë për të mirën e popullit të Kosovës”, ka shkruar ai.

Appreciate that @KQZKosova was able to certify election results less than one month after the election day. Expect Kosovo institutions (parliament, government and president) to be established soon and to start working for the benefit of Kosovo people. pic.twitter.com/EecLa1UVpf

— Ambassador Tomáš Szunyog (@EUAmbKS) March 13, 2021

Kujtojmë se Komisioni Qendror i Zgjedhjeve në mbledhjen e sotme ka certifikuar rezultatet e zgjedhjeve të 14 shkurtit në Kosovë.

Sipas të dhënave përfundimtare të KQZ-së, përqindja e daljes në zgjedhje ka qenë 48,78 për qind.

Kryetarja e KQZ-së, Valdete Daka bënë të ditur se nga numri i votuesve, Lëvizja Vetëvendosje ka 438 mijë 335 vota ose 50,28 për qind.

Partia Demokratike e Kosovës ka gjithësej 148 mijë 285 vota, apo 17 për qind. Lidhja Demokratike e Kosovës ka 110 mijë 995 vota ose 12,73 për qind.

Aleanca për Ardhmërinë e Kosovës ka 62 mijë vota 111 ose 7.12 për qind. Lista Serbe ka 44 mijë e 407 vota apo 5.09 për qind.

Nisma Socialdemokrate ka 21 mijë e 997 vota apo 2.52 për qind, duke mos e kaluar kështu pragun zgjedhor./Demokracia.com/