Qeveria amerikane e ka miratuar shitjen e 40 aeroplanëve luftarakë F-16 në Turqi – vendim i shtyrë për një kohë të gjatë – pasi Ankaraja e ratifikoi anëtarësimin e Suedisë në NATO.
Në marrëveshje përfshihet edhe shitja e pajisjeve për 79 aeroplanë të tjerë F-16 të forcave ajrore turke, raporton televizioni BBC.
Departamenti i Shtetit i ShBA-së i tha Kongresit se e kishte miratuar edhe shitjen e 40 aeroplanëve luftarakë të tipit F-35 në Greqi, me vlerë të 8,6 miliardë dollarëve, shkruan Nacionale.
Turqia e ratifikoi hyrjen e Suedisë në NATO pas më shumë se një viti shtyrjeje që kishte shkaktuar tensione në aleancën ushtarake.
Ankaraja e kishte bërë së pari kërkesën për blerjen e këtyre aeroplanëve në vitin 2021, por vonesa për ratifikimin e anëtarësimit të Suedisë në NATO doli të ishte pengesë e madhe. Turqia thoshte se ishte e shqetësuar për atë që e quante përkrahje të Suedisë për separatistët kurdë.
Megjithatë, deputetët turq e ratifikuan hyrjen e Suedisë në aleancë këtë javë dhe presidenti Rexhep Erdogan e dha nënshkrimin përfundimtar.
Pastaj, presidenti amerikan, Joe Biden, bëri thirrje që shitja e aeroplanëve F-16 në Turqi të miratohej “pa vonesë”.
“Miratimi im për kërkesën e Turqisë për të blerë aeroplanë F-16 ka qenë pjesë e miratimit turk të anëtarësisë së Suedisë në NATO”- tha senatori demokrat, Ben Cardin, shef i Komisionit për Marrëdhënie të Jashtme në Senat, që është njëri nga katër komisionet kyçe që duhet ta miratojnë shitjen e armëve jashtë vendit.
“Por mos gaboni: ky nuk ishte një vendim tek i cili erdha me lehtësi”- shtoi ai.
Senatori Cardin tha më tej se gjendja e të drejtave të njeriut në Turqi duhet të përmirësohet si dhe ky shtet duhet të bëjë më shumë për ta mbajtur Rusinë përgjegjëse për pushtimin e Ukrainës.
Tani Hungaria është anëtarja e vetme e NATO-s që ende nuk e ka ratifikuar hyrjen e Suedisë në aleancë, edhe pse rishtazi ka pasur shenja të përparimit në këtë drejtim.