Banka qendrore e Rusisë rriti normat e interesit me më shumë se dy herë të hënën në një përpjekje për të stabilizuar tregjet financiare të vendit, pasi sanksionet e pashembullta perëndimore bënë që rubla të bjerë deri më 29 për qind.
Banka qendrore rriti normën e saj kryesore të interesit në 20 për qind nga 9.5 për qind në një vendim urgjent, duke thënë se “kushtet e jashtme për ekonominë ruse kanë ndryshuar në mënyrë drastike”.
Rubla ra në pothuajse në 118 kundrejt dollarit amerikan të hënën, sipas të dhënave të Bloomberg. Monedha u zhvlerësua, pasi në fundjavë presidenti rus Vladimir Putin vuri forcat e tij bërthamore në gatishmëri të lartë, ndërsa SHBA dhe Europa vendosën sanksionet e tyre më të ashpra në një përpjekje për të përjashtuar vendin nga sistemi financiar global.
Obligacioni më i madh i huaj i Rusisë, një obligacion prej 7 miliardë dollarësh i maturuar në vitin 2047, u përgjysmua në çmim në 35 cent për dollarin, sipas të dhënave të Tradeweb. Investitorët thanë se tregu ishte jashtëzakonisht i vështirë. “Nëse shihni një citim në ekran, ai mund të jetë i drejtpërdrejtë ose jo,” tha njëri. “Nuk ka asgjë të sigurt në këtë mjedis.”
Lëvizjet e tregut erdhën pasi ushtria e Ukrainës tha të hënën se kishte zmbrapsur një natë tjetër sulmesh në Kiev, teksa kolonat e trupave ruse përpiqeshin vazhdimisht të sulmonin kryeqytetin.
Në një shenjë të hershme se si Moska po vihet nën presion në tregjet botërore, Norvegjia tha të dielën se fondi i saj i naftës 1.3 trilion dollarë, fondi më i madh i pasurisë sovrane në botë, do të ngrijë investimet e saj në asetet ruse dhe do të fillojë të largohet nga vendi. BP, grupi energjetik në Mbretërinë e Bashkuar, tha gjithashtu se do të heqë dorë nga 20 për qind të aksioneve në kompaninë shtetërore ruse të naftës Rosneft, që zotëron që nga viti 2013.
Rubla u godit rëndë që javën e kaluar, duke rënë në nivele rekord pas pushtimit dhe vendosjes së sanksioneve nga SHBA-ja dhe Europa.
SHBA dhe aleatët e saj i shtuan masat ndëshkuese të shtunën, duke shënjesturar bankën qendrore të Rusisë, të cilës i ndaluan përdorimin e rezervave ndërkombëtare. Aleatët perëndimorë ranë dakord gjithashtu të heqin disa nga huadhënësit e vendit nga sistemi i mesazheve Swift, një pjesë thelbësore e infrastrukturës për pagesat globale.
