Suksesi i Ballkanit në futboll dhe i Golden Eagle Yllit në basketboll, kanë bërë që qyteti i vogël i Kosovës, Suhareka, të duket madhështore në sportin kosovar gjatë vitit 2022.
Ballkani triumfoi në Superligën e Kosovës duke u stolisur me titullin e parë të kampionit për herë të parë në histori.
Përveç kësaj, lavdinë edhe më të madhe Ballkani e bëri në Ligën e Konferencës, duke arritur të kualifikohet në grupe dhe të arrijë rezultate të mira, por që në fund nuk i mjaftuan të kalojë grupin.
Golden Eagle Ylli, ekipi suharekas arriti të mbrojë titullin e kampionit në elitën e basketbollit kosovar si dhe të bëjë gara për herë të parë edhe në FIBA Europe Cup.
Kapiteni i Ballkanit, Edvin Kuç e ka cilësuar vitin 2022 si më të suksesshmin. Mesfushori nga Mali i Zi tha se po e shijon jetën në Suharekë.
“Sigurisht që viti 2022 do ta kujtojë si vitin më të suksesshëm deri më tani. Për herë të parë u bëmë kampionë të Kosovës. Luajtëm në Evropë dhe për herë të parë luajtëm në fazën e grupeve të një gare evropiane (Liga e Konferencës). Për sa kohë të jem i respektuar, e shijojë Suharekën, kam takuar shumë miq të mirë, familja ime dhe unë jemi të lumtur, kjo është gjëja më e rëndësishme për mua”, deklaroi mesfushori Edvin Kuç për Demokracia.com.
Edhe kapiteni i skuadrës së basketbollit Golden Eagle Ylli, Gëzim Morina ka vlerësuar të arriturat e tij dhe bashkëlojtarëve, duke theksuar mbrojtjen e titullit kampion.
“Ka qenë një vit i vështirë, i stërngjeshur me shumë ndeshje. Kam kaluar periudha të mira dhe aso jo edhe aq të mira. Përfaqësimi i qytetit tonë në garat e FIBA Europe Cup për herë të parë në histori ka qenë ndjenjë mjaftë e mirë. Mirëpo, fitimi i titullit kampion i Kosovës për herë të dytë rresht me skuadrën e Golden Eagle Yllit padyshim që ka qenë e arritura më e madhe e këtij viti dhe shpërblim për punën e bërë. Festimi i titullit në Suharekë me mijëra banorë suharekas, do mbetet gjithmonë një kujtim shumë i dashur për mua”, tha Morina për Demokracia.com.
Ballkani, por edhe Golden Eagle Ylli janë në garë për trofe edhe këtë edicion në dy frontet./Demokracia.com/
