Prokuroria Themelore e Prishtinës ka autorizuar Policinë e Kosovës që t’i ndërmarrë veprimet e nevojshme për rastin me pacientin i cili vdiq dy ditë më parë në Qendrën Klinike Universitare të Kosovës (QKUK), pas një operacioni të rrallë në zemër.

Lajmin për Telegrafin e ka konfirmuar zëdhënësja e Prokurorisë në Prishtinë, Laureta Ulaj. Sipas saj, në rast të ndonjë paraqitjeje së elementeve të ndonjë vepre penale do të veprohet tutje me këtë rast.

“Prokurori i Shtetit ka autorizuar policinë të ndërmarrin veprimet e nevojshme, me qellim të sqarimit të kësaj çështjeje dhe eventualisht në rast të paraqitjes së elementeve të ndonjë vepre penale, do të veprohet tutje me këtë rast”, ka thënë ajo.

Ndryshe, kirurgu i Qendrës Klinike Universitare të Kosovës (QKUK), Kushtrim Shala, e kishte shpërndarë një operacion si të suksesshëm në rrjetet sociale, por në fakt pacienti ka ndërruar jetë disa orë pas intervenimit.

Të mërkurën, Shala e ka paraqitur si sukses operacionin “David” te një pacient me diseksion akut të aortës dhe rupturë në nivel të rrënjës së saj.

Siç ka thënë vetë ai në postimin e tij në Facebook, ky është nga operacionet e rralla që kryhet kryesisht në qendra te mëdha me volum dhe eksperiencë afatgjatë dhe të specializuara për kirurgjinë e aortës.

Por, në fakt, operacioni nuk ka pasur sukses, pasi pacienti ka vdekur pas disa orësh.

Drejtori i Klinës së Kardiokirurgjisë, Rifat Brahimaj, ka thënë se Shala ka kryer një operacion për të cilin është dashur përvoja të cilën nuk e ka pasur.

Ai për Telegrafin tha se ka kërkuar që ky rast të hetohet, ndërsa ka deklaruar se në koordinim me drejtorinë e ShSKUK-së do të merren masat e nevojshme.

E, ndaj deklarimeve të drejtorit Brahimaj ka reaguar kardiokirurgu Shala, përmes një postimi në Facebook, duke thënë se “Rifat Brahimaj, pa qenë fare prezent dhe pa patur fare idenë për gjendjen e pacientit në pranim, rrjedhën e trajtimit (operacionit) dhe gjendjen në dalje të operacionit, pa kontaktuar fare me mua si kardiokirurg operator dhe pa kërkuar sqarim për rrjedhjen e operacionit (që ka të drejtë ta bëjë në cilësinë e u.d. drejtorit) thërret mediat dhe u flet për operacionin tim e madje dhe këtë e bënë duke qenë në pushim vjetor”.

Ndërsa, kardiologu Gani Bajraktari, i ka dalë në mbrojtje kirurgut të Qendrës Klinike Universitare të Kosovës (QKUK), Kushtrim Shala, për të cilin pati reagime pas vdekjes së pacientit disa orë pas operimit.

Në fakt, Shala pasi kishte kryer operimin e pacientit me disa doktorë tjerë, kishte shpërndarë detaje në llogarinë e tij në Facebook, duke e quajtur si intervenim të suksesshëm.