Policia e Kosovës do të furnizohet së shpejti me një pajisje digjitale për detektimin e automjeteve të paregjistruara, bazuar në një marrëveshje mes Ministrisë së Punëve të Brendshme dhe Byrosë Kosovare të Sigurimeve.
Siç ka mësuar Paparaci, Byroja Kosovare e Sigurimeve ka shprehur gatishmërinë e financimit të një pilot-projekti për Policinë e Kosovës në mënyrë që të detektojë automjetet e paregjistruara.
Një draft-marrëveshje mes Ministrisë së Punëve të Brendshme dhe Byrosë Kosovare të Sigurimeve, tashmë është arritur.
Pajisja digjitale për detektimin e automjeteve të paregjstruara do t’i dhurohet Policisë së Kosovës.
Pilot-projekti do të implementohet fillimisht në Prishtinë, tha të mërkurën Hysen Durmishi, zëvendësministër i Infrastrukturës.
“Do të fillojmë me tiketat ngjitëse duke vazhduar me projektin e pajisjeve digjitale si pilot projekt për Prishtinën, ku këto paisje detektojnë automjetet e paregjistruara”, tha Durmishi.
Sipas informatave të Paparacit, BKS-ja ka shprehur gatishmëri për financimin dhe ofrimin e mbështetjes të shtrirjes së projektit në të gjithë Kosovën.
Nga 1 Marsi, në Kosovë pritet të implementohet edhe projekti i “tiketave ngjitëse”.
Edhe ky projekt është iniciuar nga Byroja Kosovare e Sigurimeve. Projekti do të financohet po ashtu nga kompanitë e sigurimeve.