Ministria e Arsimit dhe Shkencës ka dalë me një sqarim pas dorëzimit të kallëzimit penal nga LVV-ja kundër ministrit në detyrë, Ramë Likaj dhe dy zyrtarëve të tjerë të kësaj ministrie.
Ministria e Arsimit dhe Shkencës (MASH), është sqaruar pas dorëzimit të kallëzimit penal të Lëvizjes Vetëvendosje kundër ministrit të detyrë, Ramë Likaj dhe dy zyrtarëve të kësaj ministrie për keqpërdorim të detyrës zyrtare, shkruan Demokracia.com.
Përmes një njoftimi për medie, MASH-i ka bërë të ditur se Likaj nuk ka nënshkruan asnjë dokument që lidhet me tenderin “Blerja e pajisjeve për mbrojtjen e objekteve arsimore për qëndrueshmëri dhe blerja e pakove të nevojshme për fusha lëndore dhe mirëmbajtje”.
Lexo edhe:
MASH po ashtu bën të ditur se, kërkesa e nënshkrimit të procedurave të prokurimit është përcjellë nga Divizioni i Infrastrukturës dhe në pjesën e specifikimeve teknike janë 43 artikuj.
Sqarimi i plotë i MASH-it, pa ndërhyrje:
Ministria e Arsimit dhe Shkencës sqaron se, kallëzimi penal i ngritur ndaj ministrit Ramë Likaj nuk qëndron për arsye se, ministri nuk ka nënshkruar asnjë dokument që lidhet me tenderin “Blerja e pajisjeve për mbrojtjen e objekteve arsimore për qëndrueshmëri dhe blerja e pakove të nevojshme për fusha lëndore dhe mirëmbajtje”. Pra, dosja e tenderit është nënshkruar nga personat përgjegjës (zyrtarët e MASH) dhe personi i autorizuar nga ministri.
MASH po ashtu bën të ditur se, kërkesa e nënshkrimit të procedurave të prokurimit është përcjellë nga Divizioni i Infrastrukturës dhe në pjesën e specifikimeve teknike janë 43 artikuj. Në bazë të kërkesës së iniciuar të Divizionit të Infrastrukturës, gjatë procedurës së prokurimit është bërë një gabim teknik, i cili është rregulluar shtatëmbëdhjetë ditë para hapjes së tenderit.
MASH gjithashtu njofton se, kontrata në fjalë është nënshkruar për 43 artikuj, siç është përshkruar në kërkesë dhe nuk ka pasur ndryshim në çmime. Shpallja e fituesit është bërë sipas ofertës me çmimin më të ulët.
Tutje ju bëjmë me dije se, inicimi i procedurave të prokurimit ka filluar më 4 nëntor 2020 dhe hapja është bërë më 27 nëntor 2020. Procedurat kanë qenë transparente dhe të publikuara në e-prokurim.
Gjatë procedurës së prokurimit ka pasur një ankesë nga një operator ekonomik, ku OSHP-ja ka marrë vendim në favor të autoritetit kontraktues. Vendimi i OSHP-së me numër A.nr.1069/20, ankesën e operatorit ekonomik e hedh si të palejuar dhe konstaton se autoriteti kontraktues, pra MASH mund të vazhdojë tutje me procedurat e prokurimit publik.
MASH gjithashtu njofton se, procedurat kanë qenë transparente dhe në përputhje të plotë më Ligjin e Prokurimit. /Demokracia.com
