Pengjet izraelitë të liruar nga Hamasi folën për kohën e tyre në tunelet nën Gaza, duke i krahasuar kushtet me Holokaustin. Ata përshkruan javë të tëra frike dhe urie brenda kufirit të tuneleve poshtë Gazës dhe i bënë thirrje botës që të mos harrojë ata që janë ende në robëri.

Komentet e tyre u transmetuan në një tubim në Tel Aviv para qindra izraelitëve që u mblodhën për të kërkuar lirimin e më shumë se 130 pengjeve të tjerë ende në duart e grupit militant. Vëllai dhe motra Itay dhe Maya Regev ishin në festivalin Supernova më 7 tetor kur persona të armatosur të Hamasit hapën zjarr, duke vrarë më shumë se 350 njerëz.

“Ditët atje kalojnë si një përjetësi. Është uria, është malli për familjen, është mentaliteti i vështirë”, tha Itay, i ulur pranë motrës së tij në video.

Ndërsa Maya shtoi se çdo ditë atje është një ferr. “Çdo ditë atje është si ferri. Frikë anormale, gjumë zero. Natën dëshirat janë të çmendura dhe të mos dish është thjesht e frikshme,” tha ajo.

Margalit Moses, një 78-vjeçare e mbijetuar nga kanceri, tha se një nga kapësit e saj i mori aparatin e oksigjenit. “Mund të merrja frymë, por nuk mund të flija. Nuk kam fjetur për 49 ditë”, tha ajo në dëshminë e saj në video. Të mbahesh peng në tunele është një situatë e padurueshme. Ne duhet t’i kthejmë njerëzit sa më shpejt të jetë e mundur,” shtoi ajo.