Gjatë vitit 2023, Kryeministri i Kosovës, Albin Kurti, është munduar shumë që t’i ikë publikimit të marrëveshjeve që arrinte me Serbinë, për shkak të frikës së tij nga reagimi i qytetarëve.
Të gjitha këto marrëveshje ishin në kundërshtim të plotë me premtimet e tij si opozitar, kundërshtime që i ndihmuan të vinte në pushtet, shkruan Demokracia.com.
Por, në dy-tri raste, zëvendësi i tij Besnik Bislimi, ka zbuluar në kuptimin e plotë të fjalës përmbajtjen e rrezikshme të marrëveshjeve të Albin Kurtit.
S’KA NJOHJE FORMALE NË MARRËVESHJEN KURTI – VUÇIQ, LËSHIM I MADH I KOSOVËS
Më 9 shtator 2023, Zëvendëskryeministri i Kosovës, Besnik Bislimi, i ka dhënë përgjigjen përfundimtare çështjes së njohjes reciproke ndërmjet Kosovës dhe Serbisë, pas Marrëveshjes Bazë të Brukselit (27 shkurt 2023) dhe pjesës integrale të saj, Aneksin e Ohrit (18 mars 2023), të cilat u pranuan nga shefi i tij, kryeministri Albin Kurti.
Me këto marrëveshje, sipas zëvendësit të Kurtit, “nuk ka njohje formale [të Kosovës nga Serbia] dhe ky ishte lëshim i madh i Kosovës”, shkruan Demokracia.com.
“Serbia u pajtua me tekstin e Marrëveshjes dhe zbatimi i plotë i saj na çon në një situatë të re dhe më stabile se sa është tani. Me marrëveshjen bazë (27 shkurt), Serbia u pajtua që ta trajtojë Kosovën si një anëtare sovrane të barabartë, të njohë integritetin tonë territorial, të mbajë marrëdhënie normale si me të gjithë fqinjët e tjerë dhe të mbështesë anëtarësimin e Kosovës në organizatat ndërkombëtare. Ne e kuptojmë se nuk ka njohje formale dhe ky ishte një lëshim i madh i Kosovës”, bëri të ditur Bislimi gati 6 muaj pas pranimit të kësaj marrëveshjeje nga Kurti.
https://demokracia.com/bislimi-per-marreveshjen-e-ohrit-ska-njohje-formale-leshim-i-madh-i-kosoves
Kjo deklaratë e Bislimit nxori zbuluar mashtrimin e madh të drejtuesve shtetërorë, presidentes Vjosa Osmani, kryeministrit Albin Kurti dhe kryeparlamentarit Glauk Konjufca.
Të tre drejtuesit shtetërorë e kishin vlerësuar me gjuhë të përbashkët dhe nota të larta rezultatin e 27 shkurtit në Bruksel dhe 18 marsit në Ohër, duke e konsideruar atë si një sukses të jashtëzakonshëm, pasi “Serbia e ka njohur de-facto shtetin e Kosovës”.
ZAJEDNICA E PRANUAR NGA KURTI I REFEROHET REZOLUTËS 1244
Në Marrëveshja Bazë [Bruksel, 27 shkurt 2023] kryeministri i Kosovës, Albin Kurti është dakorudar (neni 7) që serbëve në Kosovë t’iu sigurohet një nivel i duhur i vetëmenaxhimt dhe një kanal i drejtpërdrejtë komunikimi me Qeverinë e Kosovës. Ndërkaq, në pjesën e dytë të të njëjtit nen, Kosova ka marrë obligime që ta zyrtarizojë statusin e Kishës Ortodokse Serbe. Ky nen ka ngjallur frikë në Kosovë sepse, siç është thënë, siguron autonomi për serbët në Kosovë nën Zajednicë.
Kryeministri Kurti ka filluar procesin e zbatimit të nenit 7 dhe më 21 tetor 2023, Kurti ka pranuar edhe draft-statutin për Asociacionin e Komunave me Shumicë Serbe, të cilin ia kanë dorëzuar 5 emisarët që përfaqësojnë ShBA-në, BE-në, Gjermaninë, Francën dhe Italinë, si dhe më 26 tetor 2023 ka shprehur gatishmëri para liderëve evropianë (Scholz, Macron, Meloni, Michel, Borrell) që të njëjtin ta nënshkruajë.
Përmbajtja zyrtare e këtij dokumenti nuk është bërë ende publike, por për të zbuluar detajin e rrezikshëm të dokumentit të pranuar nga Kurti ishte përkujdesur sërish zëvendësi i tij në Qeveri, Besnik Bislimi.
Më 13 dhjetor 2023, Zëvendëskryeministrit të Kosovës, Besnik Bislimi, në një intervistë dhënë për RTK-në ka shpërfaqur në publik njërin nga skandalet më të mëdha të kryeministrit Albin Kurti, i cili me veprimet dhe obligimet që ka marrë para bashkësisë ndërkombëtare rezolutojnë të rrezikshme për kushtetutshmërinë e Republikës së Kosovës.
Sipas Bislimit, “diku në draft [Rezoluta 1244] përmendet. Për këtë përgjigjen ata që e kanë hartuar”.
Mbështetja e Statutit të Zajednicës apo Asociacionit të Komunave me Shumicë Serbe në Rezolutën 1244 të Këshillit të Sigurimit të OKB-së e vitit 1999, për profesorin e së Drejtës Ndërkombëtare dhe njëherit ish-kryetar i parë i Gjykatës Kushtetuese të Kosovës, Enver Hasanin, “ka pasojë të drejtpërdrejta për shtetësinë e Kosovës dhe shënon fazën e re në procesin e zhbërjes së Mendimit Këshilldhënës të GJND-së për Kosovën dhe, për rrjedhojë, të pavarësisë së shpallur më 17 shkurt 2008”.
Vetëm një ditë më herët, më 11 dhjetor 2023, Zëvendëskryeministri Bislimi kishte bërë një deklaratë tjetër, që gjithashtu demantonte propagandën e Kurtit. “Qeveria nuk ka garantuar që [Statuti i Zajednicës] nuk ka shkelje kushtetuese”, deklaronte Bislimi në një intervistë për RTV 21.
Sipas kësaj deklarate, kryeministri Albin Kurti duke qenë i vetëdijshëm se draftstatuti për Zajednicën e Komunave me Shumicë Serbe mund të jetë jashtë përkufizimeve që lejon Kushtetuta e Republikës së Kosovës është vetëofruar që ta nënshkruajë atë. /Demokracia.com/