Paneli Zgjedhor për Ankesa dhe Parashtresa (PZAP), nesër do të japë përgjigje rreth ankesave të partive politike.

Nëntë apele nga subjekte politike e kandidatë, u dorëzuan më 23 janar, pas moscertifikimit nga Komisioni Qendror Zgjedhor në mbledhjen e 22 janarit, për pjesëmarrje në zgjedhjet e parakohshme parlamentare të 14 shkurtit në Kosovë.

Të martën është afati i fundit kur Paneli Zgjedhor për Ankesa dhe Parashtresa (PZAP), duhet t’i japë epilog ankesave të subjekteve politike dhe kandidatëve.

Komisioni Qendror i Zgjedhjeve të premten nuk ka certifikuar listat zgjedhore të subjekteve politike Lëvizja Vetëvendosje (LVV), Nisma Socialdemokrate dhe Aleanca për Ardhmërinë e Kosovës (AAK) pasi këto parti nuk i kishin zëvendësuar kandidatët për të cilët Këshilli Gjyqësor i Kosovës (KGJK) kishte thënë se nuk janë në përputhje Ligjin për zgjedhjet e përgjithshme, shkruan Demokracia.com.

KGJK kishte thënë se “janë 47 kandidatë nga rreth 1,080, të cilët janë shpallur fajtorë për vepër penale me një vendim përfundimtar të gjykatës në tri vjetët e fundit”.

Pas vendimit të KQZ-së, për moscertifikimin e këtyre listave zgjedhore, Lëvizja Vetëvendosje, ishte ankuar menjëherë në PZAP, pasi që e quanin të padrejtë vendimin e KQZ-së.

Në anën tjetër, nga Aleanca për Ardhmërinë e Kosovës, kanë thënë për Demokracia.com, se ata në PZAP janë ankuar vetëm që të respektohet data e certifikimit, pra që data e certifikimit të llogaritet nga data e certifikimit dhe jo nga data e shpalljes së zgjedhjeve.

Po ashtu, nga ky subjekt politik kanë bërë të ditur se kanë dorëzuar edhe tre emra për zëvendësimin e listës së tyre në KQZ, ashtu edhe siç është kërkuar.

Në anën tjetër, Nisma Socialdemokrate, këtë vendim të KQZ-së e kishte quajtur të gabuar, dhe presin që këtë gjë ta përmirësojë PZAP-i.

PZAP-ja, përmes një njoftimi të fundit ka bërë të ditur se nesër është afati i fundit kur edhe do të merren vendimet për këto nëntë apele të subjekteve politike.

“Përmes këtij njoftimi informojmë të gjitha mediat e Republikës së Kosovës e me gjerë se, PZAP-i përmes Faqes zyrtare dhe Facebook të tij zyrtar, do të ju informoj në afatin më të shpejtë të mundshëm  për vendimet që do ti marrë lidhur me Apelet e paraqitura nga subjektet politike kundër vendimit te KQZ-së, për mos certifikim të subjekteve politike dhe kandidateve. Afati për shqyrtimin dhe vendosjen e këtyre apeleve është 72 orë nga momenti i dorëzimit të këtyre apeleve nga palët në PZAP që i bie se vendimet do të merren deri nesër me date 26 janar 2021”, thuhet në njoftimin e PZAP-it.

Të premten, Komisioni Qendror i Zgjedhjeve nuk ka certifikuar listat e kandidatëve për deputetë të gjashtë subjekteve politike, në mesin e tyre edhe listën e Lëvizjes Vetëvendosje, Aleancës për Ardhmërinë e Kosovës dhe Nismës Socialdemokrate. /Demokracia.com