Presidenti ukrainas, Volodymyr Zelensky do të flasë me senatorët amerikanë sot (5 Dhjetor) në një konferencë konfidenciale përmes videokonferencës, njoftoi udhëheqësi i shumicës në Senat, Chuck Schumer.

Sipas raportimeve të mediave ukrainase, Sekretari i Shtetit Antony Blinken, sekretari i mbrojtjes Lloyd Austin dhe drejtori i inteligjencës Avril Haynes do të marrin pjesë gjithashtu në konferencë.

Zelensky do t’i informojë senatorët për statusin e luftës në Ukrainë dhe nevojën për një raund tjetër të ndihmës ushtarake, një ditë përpara se Senati të votojë procedurën legjislative për një paketë urgjente ndihme të huaj prej 106 miliardë dollarësh, e cila përfshin më shumë se 61 miliardë dollarë për Ukrainën.

“Administrata e ka ftuar Presidentin Zelensky të flasë me senatorët si pjesë e konferencës sonë të klasifikuar, kështu që ne mund të dëgjojmë drejtpërdrejt nga ai se çfarë është në rrezik në këtë votim. Unë kërkoj që të gjithë senatorët të marrin pjesë në këtë konferencë të rëndësishme”, tha Schumer në senat.