Udhëheqësi suprem i Iranit, Ayatollah Ali Khamenei, është takuar me liderin e grupit palestinez Hamas, të mbështetur nga Teherani, Ismail Haniyeh, në Teheran, njoftoi media shtetërore iraniane të dielën, një ditë pasi një zyrtar i Hamasit tha se ata kishin mbajtur një takim ditët e fundit.

Media shtetërore iraniane tha se Haniyeh, i cili ka banuar midis Katarit dhe Turqisë që nga viti 2019, “e informoi Khamenein mbi zhvillimet e fundit në Rripin e Gazës dhe krimet e regjimit sionist në Gaza, si dhe zhvillimet në Bregun Perëndimor”.

Republika Islamike thotë se mbështet Hamasin, por nuk luajti asnjë rol në sulmin e befasishëm të militantëve ndaj Izraelit muajin e kaluar.

“Ayatollah Khamenei vlerësoi qëndrueshmërinë dhe vendosmërinë e popullit të Gazës dhe shprehu keqardhje të fortë për krimet e regjimit sionist, të mbështetur drejtpërdrejt nga Uashingtoni dhe disa vende perëndimore”, tha televizioni shtetëror i Iranit.

Pa dhënë detaje se kur u zhvillua takimi, agjencia iraniane e lajmeve Tasnim tha se autoriteti i lartë i vendit, Khamenei, “theksoi politikën e qëndrueshme të Teheranit për të mbështetur forcat e rezistencës palestineze kundër pushtuesve sionistë”.

Institucioni klerik i Iranit ka paralajmëruar Izraelin, të cilin ai refuzon ta njohë, për “pasoja të rënda”, nëse vazhdojnë sulmet në Rripin e Gazës.