Anija luftarake ruse “Moska” është mbytur, njoftoi ministria ruse. Ministria e Mbrojtjes e Rusisë ka lëshuar një deklaratë duke thënë se luftanija e tyre “Moska”, anija kryesore e flotës ruse të Detit të Zi, është fundosur, përcjellë Demokracia.com.

Është ende e paqartë nëse ajo është goditur nga armët ukrainase. Anija besohet se ka pësuar dëmtime të konsiderueshme dhe mendohet se ishte nisur për në Sevastopol të Krimesë, përpara se të fundosej.

Çfarë lloj luftanijeje e fuqishme ruse është kjo?

“Moska” është 611 këmbë (186 metra) e gjatë me afro 500 anëtarë të ekuipazhit dhe është krenaria e marinës ruse në Detin e Zi. E futur fillimisht në Marinën Sovjetike si Lavdia e viteve 1980, anija u riemërua “Moska” në 1995 dhe, pas një rinovimi, rihyri në shërbim në 1998, sipas uebsajtit ushtarak Naval-Technology.com.

“Moska” është e armatosur me një sërë raketash anti-anije dhe kundërajrore, si dhe me silurët dhe topat detarë dhe sistemet e mbrojtjes kundër raketave.

“Moska” gjithashtu ka një rëndësi simbolike për Ukrainën, sepse ishte një nga anijet që mori pjesë në bisedën e famshme në ishullin e gjarpërinjve në shkurt, tha Oleksiy Arestovich, një këshilltar i presidentit ukrainas Volodymyr Zelensky.

Sipas një bisede të supozuar në fund të shkurtit, ndërsa rusët iu afruan garnizonit ukrainas në ishullin e gjarpërinjve në Detin e Zi, një oficer rus tha: “Kjo është një anije luftarake ruse. Unë ju sugjeroj të lini armët dhe të dorëzoheni për të shmangur gjakderdhjen dhe viktimat e panevojshme përndryshe do të bombardoheni”, ushtari ukrainas dëgjohej duke iu përgjigjur: “Shkoni në dreq”.

“Moska” është anija e dytë e madhe detare ruse që u fundos gjatë luftës në Ukrainë. Në fund të marsit, Ukraina njoftoi se një sulm me raketë kishte shkatërruar një anije ruse në portin e Berdyansk. /Demokracia.com/