Lazio ka rënë dakord për një huazim të dyfishtë me detyrim blerje me Juventusin për lojtarët Luca Pellegrini dhe Nicolo Rovella.
Sipas Sky Sport Italia, negociatat e zhvilluara sot rezultuan të frytshme dhe janë mbyllur me një marrëveshje për dyshen.
Juventusi do të fitojë 17 milionë euro për Rovellan dhe 4 milionë euro për Pellegrinin, pra një total prej 21 milionë eurove.
Mbrojtësi i majtë Pellegrini kishte kaluar tashmë gjashtë muajt e fundit të sezonit 2022/23 si huazim te Lazio dhe ishte i vendosur të qëndronte.
24-vjeçari gjithashtu ishte lidhur me Milanin, Fulhamin dhe OGC Nice gjatë verës.
Po ashtu ka marrëveshje edhe për mesfushorin 21-vjeçar Rovella, i cili do të luajë në ‘Olimpico’ nën drejtimin e trajnerit Maurizio Sarri.
Rovella e kaloi sezonin e kaluar si huazim te Monza, ndërsa ishte blerë nga Genoa në janar 2021 për 26 milionë euro plus bonuset. /Telegrafi/
