Shumica konservatore në Gjykatën e Lartë ka hedhur dyshime mbi planin e presidentit amerikan, Joe Biden i cili i kërkon punonjësve amerikanë të vaksinohen kundër COVID-19 ose t’u nënshtrohen testeve javore.

Gjyqtarët ranë dakord për të shqyrtuar përçarjen partiake lidhur me vaksinat dhe për të dëgjuar avokatët e 27 shteteve të udhëhequra nga republikanët, të cilët argumentuan se administrata demokrate e kishte tejkaluar autoritetin e saj.

Në komentet dhe pyetjet e tyre, drejtësitë dukeshin të ndara përgjatë të njëjtave linja, ku tre të emëruarit demokratë shprehën mbështetje të fortë për planin e Biden-it, ndërsa gjashtë të emëruarit republikanë shprehën një skepticizëm të vazhdueshëm.

Gjyqtarët; Elena Kagan dhe Stephen G. Breyer thanë se ishin të habitur që gjykatat mund të bllokonin kërkesën për vaksinimin e punonjësve kundër një virusi që ka shkaktuar vdekjen e më shumë se 800,000 amerikanëve.

Kagan tha se ligji federal autorizoi Departamentin e Punës të miratojë rregulla emergjente që janë të nevojshme për të mbrojtur punonjësit nga një rrezik i madh.

“Pse nuk është e nevojshme kjo?” tha Kagan lidhur me planin e Biden-it, ku punonjësve të kompanive të mëdha u kërkohet të vaksinohen ose t’u nënshtrohen testeve javore. “Kjo është një situatë e jashtëzakonshme që ky vend nuk është përballur ndonjëherë më parë. Ne e dimë se mënyra më e mirë për të parandaluar përhapjen e virusit është që njerëzit të vaksinohen”, shkruan ATA

Breyer tha se mbi 700,000 persona sapo kanë rezultuar pozitivë me Covid-19 dhe spitalet po mbushen përsëri. Ai shtoi se do të ishte e pabesueshme nëse gjykata do të thoshte se, ndalimi i vaksinimeve do të ishte në interesin publik.

Por konservatorët e gjykatës dukeshin të përgatitur për të pezulluar rregullin. Ata janë skeptikë ndaj rregulloreve të reja federale duke vënë në dyshim nëse Kongresi në vitin 1970 kishte autorizuar një rregullore që do të kërkonte vaksinime për 80 milionë punonjës.