Gjermania po planifikon të shpenzojë gati 9 miliardë euro këtë vit për të ndihmuar në blerjen e deri në 635.1 milionë vaksinave për COVID-19 për popullsinë e saj dhe vendet e tjera anëtare të BE-së, thonë burimet zyrtare të Ministrisë së Financave të Gjermanisë, shkruan Reuters, transmeton Demokracia.com.
Vonesat në shpërndarjen relativisht të ngadaltë të vaksinave nga BE-ja dhe shqetësimi për variantet e reja të COVID-19 po e bëjnë më të vështirë për qeveritë evropiane të lehtësojnë kufizimet aktuale të pandemisë. Problemet kanë çuar në disa tensione midis Brukselit dhe Berlinit.
Zëvendësja e Ministrit të Financave, Olaf Scholz, Bettina Hagedorn, u propozoi ligjbërësve në një letër që të miratojnë një kërkesë nga Ministri i Shëndetësisë, Jens Spahn, për një shtesë prej 6.22 miliardë eurosh për të blerë më shumë doza, sipas dokumentit të parë nga Reuters.
Ministria e Shëndetësisë do të përdorë fondet totale prej 8.89 miliardë eurosh për të blerë deri në 635.1 milionë doza vaksinash si pjesë e planeve të përbashkëta të prokurimit të Bashkimit Evropian dhe skemës kombëtare të Berlinit, thuhet në këtë dokument.
Të gjitha vendet anëtare të BE-së kanë rënë dakord të prokurojnë vaksinat sipas planit të bllokut./Demokracia.com/