Ndërmarrja Publike “Posta e Kosovës”, e cila është nën autoritetin e Qeverisë së Kosovës, ka përdorur procedurë të negociuar pa publikim të njoftimit për kontratë për të lidhur kontratë njëburimore me një kompani nga kryeqyteti i Serbisë. Kontrata është lidhur në muajin e kaluar, por Posta e Kosovës ka zgjedhur datën 12 qershor për të bërë publike këtë, shkruan Demokracia.com.

Bëhet fjalë për tenderin “Mirëmbajtja e shtypësit të Postes Hibride dhe blerjen (furnizimin) me pjesë këmbimi (rezervë) shpenzuese për shtypësin Xeikon 5000plus – Ritender”. Prokurimi i ndërmarrjes publike i ka zhvilluar negociatat vetëm me kompaninë “NVM GRAPHIC SOLUTIONS D.o.o. BRANCH IN KOSOVO Dega në Kosovë”.

Posta e ka ngarkuar sot në E-prokurim njoftimin për ‘nënshkrimin e kontratës’, ndërsa brenda këtij dokumenti shihet se kontrata është nënshkruar më 20.05.2024.

Ky njoftim ka mundur të bëhet që disa javë, pasi kontrata është lidhur me negocim.

Demokracia.com ka raportuar javë më parë se bazuar në të dhënat e ARBK-së, pronar me 100 për qind të aksioneve në këtë ndërmarrje, e cila ka degët në Kosovë dhe Kroaci, është kompania me bazë në Beograd “Nvm graphic solutions d.o.o”. Bazuar në të dhënat e ARBK-së, drejtor menaxhues i kompanisë është Marko Durovic.

Demokracia.com kishte kërkuar një përgjigje nga Posta e Kosovës lidhur me atë se “Cila është arsyeja që nuk keni realizuar tender të hapur, por me negocim me një kompani me bazë në Beograd për tenderin “Mirëmbajtja e shtypësit të Postes Hibride dhe blerjen (furnizimin) me pjesë këmbimi (rezervë) shpenzuese për shtypësin Xeikon 5000plus – Ritender”?

Kjo ndërmarrje publike nuk ka kthyer përgjigje.

Jo zyrtarisht, një zyrtar i lartë në Postën e Kosovës kishte thënë për Demokracia.com se kanë qenë të detyruar ta lidhin këtë kontratë me kompaninë serbe, pasi sipas tij tenderi i vlerës së hapur u ka dështuar një herë. “Fillimisht e kemi hapur një tender, por ai është anuluar pasi nuk ka garuar askush. Pastaj kemi parë se kjo kompani, e cila e ka bazën edhe në Kosovë ofron këso produktesh të furnizimit dhe servisimit që po këkrojmë për postën hibride në Fushë Kosovë”.

I pyetur nëse ka kompani tjera në rajon apo edhe në Kosovë me pronarë shqiptarë që ofrojnë këso shërbimesh, ky zyrtar ka thënë që këtë gjë nuk e di.

Kompania “NVM GRAPHIC SOLUTIONS D.o.o” i ka dy pronarë me nga 50 për qind të aksioneve, Marko Gjuroviq, i cili figuron në ARBK si drejtor menaxhues dhe Vojislav Erbes.

Tenderi peshon gjithsej 83 mijë euro. Prokurimi i Postës ka lënë devijim të çmimit + – 30 për qind nga vlera indikative e kontratës, çka do të thotë se kontrata mund të rritet edhe për 30 për qind.

“Posta e Kosovës SH.A. shpërblen me kontratë: “NVM GRAPHIC SOLUTIONS” D.O.O.BRANCH IN KOSOVO”, për një shumë prej: 83,019.30€ (tetëdhjetë e tre mijë e nëntëmbëdhjetë euro e tridhjetë cent“, thuhet në vendimin për dhënie të kontratës së Postës së Kosovës, përcjell Demokracia.com.

Tenderi ka qenë në dy lote dhe të dyja i janë dhënë kësaj kompanie.

Pjesa 1 – Mirëmbajtja dhe servisimi i shtypësit Xeikon 5000+ dhe

Pjesa 2 – Blerja (furnizimi) me pjesë këmbimi (rezervë) shpenzuese për shtypësin Xeikon 5000+.

Kontrata ka validitet 24 muaj. /Demokracia.com/