Kryeministri Albin Kurti para pak ditësh i cilësoi si shumë naive deklaratat e sekretarit amerikan, Antony Blinken.

Por, sekretari Blinken ishte pjesë e kabinetit të presidentit Bill Clinton gjatë periudhës së luftës së Kosovës. Gjatë administratës së Clintonit, Blinken shërbeu në Departamentin e Shtetit dhe në poste të larta në Këshillin e Sigurisë Kombëtare nga viti 1994 deri në vitin 2001. Ai kishte rol shumë aktiv gjatë periudhës së bombardimeve të NATO-s mbi ish-Jugosllavinë.

Në dokumentet e deklasifikuara, të cilat i ka siguruar Demokracia.com, emri i Antony Blinken gjendet në shumë dokumente që i ka publikuar vetë presidenti Bill Clinton.

Më 21 maj të vitit 1999, derisa avionët amerikanë e bombardonin Serbinë, Antony Blinken e mbante të informuar Këshillin për Sigurinë Kombëtare të Amerikës. Tema ishte komplekse. Britanikët ishin në favor të futjes së këmbësorisë në ish-Jugosllavi, ndërsa gjermanët, respektivisht Kancelari i Gjermanisë Schroeder e kundërshtonte ashpër. Blinken i mbante të informuara institucionet e SHBA-së për vlerësimin e shefit të kabinetit të Kancelarit të Gjermanisë për situatën në Kosovë.

”Në bisedën më të fundit të Sidit me Bodon (shef i kabinetit të kancelarit gjerman), ky i fundit kishte për të thënë për Kosovën: Trupat në tokë. Me kusht që t’i shterojmë të gjitha përpjekjet diplomatike me mirëbesim, Gjermania nuk do të bllokojë një lëvizje të trupave tokësore të NATO-së. Natyrisht, as nuk do të kontribuojë me trupa tokësore, megjithëse do të vazhdojë të ofrojë mbështetje në mënyra tjera. Ky është leximi më pozitiv që kemi pasur në lidhje me qëllimet gjermane. Mbi thirrjet e MB për trupa tokësore. Schroeder i irrituar me thirrjet vokale britanike për planifikimin e forcave tokësore. E bllokon atë brenda vendit. Sa më të zhurmshëm të bëhen britanikët, aq më të zhurmshëm në kundërshtim do të bëhen gjermanët. Mesazhi i shkurtër: le t’i mbajmë këto diskutime për vete dhe jashtë shtypit”.

“Mbi perspektivat për sukses. Schroeder ndihet më i sigurt se dy javë më parë se strategjia jonë e sulmit ajror do të funksionojë. Të inkurajuar nga raportimet për problemet në Serbi. Mbi Iniciativën D’Alema. Schroeder është i shqetësuar se nëse dhe kur ndalojmë bombardimet në kontekstin e një pauze, do të jetë shumë e vështirë të fillojmë përsëri kur Milo dështon. Kështu, shqetësimi i tij i shtuar për goditjen e DAlemës në trupat tokësore: nëse iniciativa D’Alema dështon, ne do të duhet të marrim përsipër pasojat e dështimit të saj”. thuhet ndër të tjera në këtë dokument./Demokracia.com/