Albulena Haxhiu po i vazhdon emërimet sipas tekeve të saj, pa i përfillur procedurat ligjore.
Haxhiu së fundmi e ka emëruar udhëheqësen e Divizionit për Gjykatën Speciale, Argjira Asllanin, si anëtare të rregullt edhe në Panelin për Lirim me Kusht në kuadër të Këshillit Gjyqësor të Kosovës.
Për ta ushtruar këtë detyrë, zyrtari nuk duhet të jetë një i emëruar siç është znj. Asllani, por dikush që i ka kaluar të gjitha procedurat e rekrutimit për t’u bërë pjesë e institucionit.
Demokracia.com ka siguruar vendimin për emërimin e udhëheqëses së divizionit edhe në këtë pozitë të re.
“Znj. Argjira Asllani, emërohet anëtare e rregullt e Panelit për Lirim me Kusht në kuadër të Këshillit Gjyqësor të Kosovës”, thuhet në vendimin e siguruar nga Demokracia.com.
Sipas vendimit, mandati i saj do të jetë dyvjeçar, pa të drejtë rizgjedhjeje.
Demokracia.com ka pyetur në Ministrinë e Drejtësisë lidhur me emërimin e saj në këtë pozitë të re.
Nga ministria e Albulena Haxhiut e kanë konfirmuar emërimin e Asllanit si anëtare e Panelit për Lirim me Kusht.
“Bazuar në Ligjin për Ekzekutimin e Sanksioneve Penale është në diskrecionin e Ministrit të vendos për përfaqësuesin e Ministrisë së Drejtësisë në Panelin për Lirim me Kusht. Znj. Asllani është e diplomuar në Fakultetin Juridik të Universitetit të Prishtinës, si dhe ka mbaruar Provimin e Jurisprudencës në vitin 2019, rrjedhimisht i plotëson kushtet për të qenë anëtare e panelit për lirim me kusht sipas kërkesave të legjislacionit në fuqi”, thuhet në përgjigjen e Ministrisë së Drejtësisë për Demokracia.com.
Megjithatë, nga të dhënat e publikuara nga Asllani në rrjetet sociale shihet se ajo ka magjistruar në fushën civile, ndërsa bazuar në legjislacionin që e rregullon këtë çështje, zyrtari i dërguar nga Ministri i Drejtësisë duhet të jetë njohës i fushës penale.
Po ashtu, Asllani fillimisht ka qenë e emëruar si zyrtare e divizionit për të akuzuarit e ZPS-së, më pas është emëruar si udhëheqëse aty dhe nuk i është nënshtruar procedurave të regullta të rekrutimit si zyrtare.
Ministrisë së Albulena Haxhiut muaj më parë i kishte plasur edhe skandali i zhdukjes së mostrave të Astrit Deharit, aktivistit të Vetëvendosjes që humbi jetën në burg.
Ndërsa, në muajin shkurt, Haxhiu e kishte punësuar në divizionin e udhëhequr nga Argjira Asllani edhe gruan e frizerit të saj, e cila pas raportimit të Demokracia.com kishte dhënë dorëheqje.
Ministria e Haxhiut tha për Demokracia.com se dorëheqja e saj erdhi për shkak të gjendjes shëndetësore të vajzës së saj.
Edhe bashkëshorti i ministres Albulena Haxhiu, Alban Krasniqi, ditë më parë u rehatua në Komisionin Qendror të Zgjedhjeve. /Demokracia.com/