Dy nxënës të një shkolle fillore në Sidnei pësuan djegie të rënda në fytyrë dhe gjoks dhe u dërguan në spital pasi një eksperiment shkencor shkoi keq.

Ata ishin mes 11 nxënësve dhe një të rrituri – që besohet të jetë mësuesi i tyre – të plagosur në incidentin në shkollën publike Manly West rreth orës 13:20 të së hënës, sipas kohës lokale, shkruajnë mediat e huaja.

Një nga nxënësit me djegie të rënda u transportua me helikopter në spitalin e fëmijëve Westmead ndërsa një tjetër u dërgua në atë spital me ambulancë.

Nëntë nxënësit e tjerë u dërguan në spitalet Royal North Shore dhe Northern Beaches. Edhe i rrituri është dërguar në spital në gjendje të qëndrueshme.

Sipas mediave të huaja, përcjell Telegrafi, secili nga departamenti i arsimit i NSW, policia e NSW dhe SafeWork NSW do të hetojnë incidentin.

Ministrja e arsimit e NSW, Sarah Mitchell, falënderoi stafin e shkollës që “veproi kaq shpejt për të ofruar ndihmën e parë dhe për të thirrur shërbimet e urgjencës”.