Nënkryetarja e Partisë Demokratike të Kosovës (PDK), Vlora Çitaku, ka reaguar pas skandalit të ambasadorit kosovar në Francë, Mehdi Halimi, i cili u pa duke votuar dhe bëri thirrje për votim në Francë.
Demokracia.com gjatë ditës së sotme ka raportuar rreth këtij veprimi skandaloz të ambasadorit të Kosovës në Francë, Mehdi Halimi, i cili kishte bërë thirrje që të votojnë të gjithë kosovarët që kanë nënshtetësi franceze, por që kjo thirrje e tij është në kundërshtim me misionin e tij diplomatik.
LEXO EDHE:
Pas raportimit të Demokracia.com, ka reaguar edhe ish-ambasadorja e Kosovës në New York, Vlora Çitaku.
Përmes një postimi në rrjetin social Facebook, Çitaku ka kritikuar ambasadorin Halimi, duke e cilësuar veprimin e tij si jo diplomatik dhe jo profesional.
Reagimi i plotë i nënkryetares së PDK-së, Vlora Çitakut:
Dy-shtetësia lejohet me Kushtetutë edhe në Kosovë edhe në Francë. Fakti që Ambasadori i Kosovës në Francë ka dyshtetësi, nuk është precedan. Kemi pasur raste të tilla edhe më herët.
Por, kur e pashë në lajme se Ambasadori ynë paska dalë për të votuar në zgjedhjet presidenciale të Frances, e bile bile paska postuar në Facebook, sinqerisht mendova se është ndonjë fake news.
Është jo diplomatike dhe jo profesionale.
Ambasadori ynë në Paris përfaqëson Republikën e Kosovës e jo ndonjë shoqatë kulturore, dhe nuk ka asnjë lloj sensi që në mënyrë selektive t’i ndërrojë kapelat, një ditë qytetar i Francës, ditën tjetër Ambasador Fuqiplotë i Republikës së Kosovës. /Demokracia.com/