Nënkryetarja e Partisë Demokratike të Kosovës, Vlora Çitaku, nëpërmjet një postimi në “Facebook” të dielën, reagoi ndaj vizitës private të kryeministrit kosovar, Albin Kurti, në Oslo të Norvegjisë, duke e kualifikuar si “marrëzi” shkuarjen e shefit të ekzekutivit në kryeqytetin norvegjez, posaçërisht në dritën e kërcënimeve të reja për sigurinë e vendit nga shteti serb.
Njëjtë e kualifikoi edhe lajmin se Lëvizja Vetëvendosje – partia në pushtet në Kosovë – zyrtarisht i është bashkëngjitur frontit opozitar shqiptar në Maqedoninë e Veriut, përkatësisht koalicionit të përbërë nga Lëvizja Demokratike, Lëvizja Besa dhe Alternativa Shqiptare (Lidhja Evropiane për Ndryshim) – kundër Bashkimit Demokratik për Integrim.
“Nuk kam se si ta kualifikoj ndryshe përpos se si marrëzi. Një ditë pasi paralajmëroi në konferencë për shtyp sulmin e planifikuar të Serbisë kundër Kosovës, kryeministri Kurti vet shkoi në Oslo për vizitë private e partia e tij hyri në garë zgjedhore në Maqedoninë e Veriut. Kosova meriton më mirë”.
Kryeministri Kurti të dielën raportohet se udhëtoi drejt Oslos për ta kaluar festën e Krishtlindjes në gjirin e familjes, ndërsa Lëvizja Vetëvendosje edhe zyrtarisht i është bashkëngjitur frontit opozitar shqiptar në Maqedoninë e Veriut. Shumë konsideruan se përfshirja e Lëvizjes Vetëvendosje në garën zgjedhore bëhet për qëllim të përçarjes së faktorit politik shqiptar.
