Marrëveshja u nënshkrua në Londër nga Zëvendëskryeministrja, njëherësh Ministër i Infrastrukturës dhe Energjisë, Belinda Balluku dhe Presidentja e BERZH, Odile Renaud-Basso gjatë Samitit të Investimeve për Ballkanin Perëndimor.

Linja hekurudhore Vorë – Hani i Hotit ka një gjatësi prej 120 kilometrash dhe lidh Shqipërinë me Malin e Zi. Ky është projekti i dytë që Qeveria Shqiptare po zhvillon në sektorin hekurudhor pas asaj Tiranë-Durrës me degëzim në aeroportin ndërkombëtar “Nënë Tereza”.

Përmes një postimi në rrjetet sociale, Balluku e cilëson këtë projekt si të rëndësishëm, jo vetëm për Shqipërinë, por edhe rajonin, pasi do të rrisë komunikimin mes dy vendeve duke nxitur dhe lehtësuar lëvizjen e qytetarëve.

“Londër – me Presidenten e BERZH, Odile Renaud-Basso nënshkruam marrëveshjen e huasë për ndërtimin e linjës hekurudhore Vorë – Hani i Hotit. Një projekt i rëndësishëm për ne dhe rajonin, i cili do të rrisë komunikimin mes vendeve, duke nxitur e lehtësuar lëvizjen e qytetarëve”, shkruan Balluku.

Zëvendëskryeministrja, njofton gjithashtu se gjatë Samitit u diskutua edhe mbi sektorin energjetik, ku Shqipëria prezantoi nismat e ndërmarra, si dhe praktikat e ndjekura me zhvillimin e ankandeve.

“Shqipëria është një nga ato vende e cila merret si shembulli i ekselencës për sa i përket të gjitha ankandeve të energjisë që ne kemi organizuar dhe tre prej tyre tashmë kanë marrë jetë. Ndërkohë që ndamë me të gjithë investitorët, përfaqësuesit e sistemit bankar dhe sigurisht të gjithë partnerët e tjerë të cilët na kanë mbështetur në rrugëtimin tonë se kush janë planet për të ardhmen”, nënvizoi Balluku.

Ministrja e Infrastrukturës dhe Energjisë bëri të ditur se BERZH shprehu interes për të mbështetur Shqipërinë edhe në projekte të tjera të rëndësishme.

“Folëm, gjithashtu gjatë takimit me Presidenten e BERZH-it, për të gjitha planet në të ardhmen. Ata janë të interesuar që të mbështesin edhe zhvillimet dhe investimet në sektorin e ujit dhe të kanalizimeve, por sigurisht edhe në transportin e gjelbërt, si një nga alternativat më të rëndësishme, sidomos për Shqipërinë pasi të gjitha emetimet e dioksidit të karbonit në vendin tonë vijnë vetëm nga transporti rrugor”.

Kështu, thekson ajo “duke folur me një nga partnerët tanë më të rëndësishëm, me BERZH, për planet e së ardhmes mund të themi, që sot përveç firmosjes së kësaj huaje kaq të rëndësishme për linjën e hekurudhës Vorë-Hani i Hotit, ne kemi vënë edhe disa gurë themeli për projektet që kemi në të ardhmen”.

BERZH po rrit mbështetjen e saj për lidhjet strategjike të transportit në Shqipëri duke dhënë një kredi sovrane prej 98.75 milionë euro për qeverinë për rehabilitimin dhe elektrifikimin e linjës hekurudhore Vorë-Hani i Hotit.

Banka është duke udhëhequr në një projekt me vlerë 373 milionë euro, të bashkëfinancuar nga Banka Evropiane e Investimeve (EIB) dhe Bashkimi Evropian (BE) përmes Kornizës së Investimeve të Ballkanit Perëndimor (WBIF), i cili ofron 128.8 milionë euro në grante dhe teknike mbështetje asistence deri në 12.1 milionë euro.

Duke mbështetur një sektor jetik, por të nën-investuar në vend, ky projekt ndihmon zhvillimin social dhe ekonomik të Shqipërisë. Ai nxit tranzicionin e gjelbër duke promovuar një zhvendosje modale nga rruga në hekurudha të elektrizuar, një mënyrë transporti më efikase dhe miqësore me klimën.

Për më tepër, ajo shtyn përpara agjendën e reformave në vend duke ndihmuar kompaninë hekurudhore të përgatitet për fazën operacionale nëpërmjet zhvillimit të një kontrate kuadër të shërbimit publik në përputhje me praktikat më të mira ndërkombëtare.